● Os asistentes de maior idade foron Francisca Lamas Mallo (102 anos), Simona Montes Torres (94 anos) e Adolfo Formoso Chouza (93 anos).

O pavillón do CPI Cruz do Sar acolleu hoxe a XXIV edición do Encontro dous Maiores do Concello de Bergondo, evento que reúne cada ano por centos de veciños de todas as parroquias do municipio que teñan 60 anos ou máis e ao que nesta edición asistiron 448 persoas.

A tradicional misa, que comezou ás 14 horas e contou nesta ocasión coas voces do coro Costumes foi o punto de partida do evento. Ao acto relixioso seguiulle a comida, na que os asistentes compartiron mantel e charla nun ambiente festivo, e pola tarde unha actuación musical disposta polo Concello amenizou a xornada.

A festa estivo presidida pola alcaldesa, Alejandra Pérez Máquez, acompañada de diferentes membros da corporación. Houbo tamén tempo para as homenaxes aos máis lonxevos. As mulleres de maior idade asistentes foron Francisca Lamas Mallo, de Cortiñán, que fixo os 102 anos en abril e Simona Montes Torres, de 94 anos e residente en Bergondiño. Doutra banda, a homenaxe ao home de máis idade asistente recaeu este ano en Adolfo Formoso Chouza, que ten 93 anos e cumpre os 94 anos en novembro.

Ademais, Alejandra Pérez Máquez quixo facer unha mención especial a unhas persoas que no seu momento foron membros moi activos da Asociación Centro de Instrución e Recreo de Bergondo e vos seus Contornos, que se fundou en 1924 e que impulsou a construción do edificio da Senra. Antonio González Vázquez e Juan de Blanco, este último si participou hoxe na comida, descendentes do grupo de emigrantes bergondeses, residentes en New York, que enviaron fondos para comprar a leira e crear o edificio. A rexedora tamén fixo referencia a Fernando Iglesias, outro membro moi activo da asociación que, por motivos de saúde, non puido estar presente no encontro.