Esta mañá procedeuse á colocación dun novo cartel de grandes dimensións para denunciar in situ, nas estradas autonómicas, a marxinación coa que está a actuar o Goberno da Xunta en Oleiros. O novo letreiro instalouse na avenida República Uruguai na que os veciños e veciñas de Oleiros e Dorneda teñen que xogarse a vida literalmente para poder desprazarse a pé por esta estrada de titularidade autonómica.

No caso concreto desta avenida, urxe a construción de beirarrúas continuas e accesibles. O tramo con carril bici que o Concello obrigou a construír aos propietarios dos terreos da urbanización de Xaz debe ser continuado ata Oleiros, para facilitar a mobilidade ciclopeonil entre Dorneda e Oleiros. Desde a urbanización O Bosque ata a rúa Cobo, unha zona moi sinuosa, non dispón de beirarrúas.

Igual que a avenida República Uruguai, outros importantes tramos das estradas principais de Oleiros de titularidade autonómica non dispoñen de beirarrúas nin carril bici. As beirarrúas e andéns existentes foron construídos directamente polo Concello, que asumiu as obras ante a necesidade de mellorar a seguridade viaria e facilitar a mobilidade peonil e ciclista.

O Goberno da Xunta está a practicar unha política caciquil e partidista que basicamente consiste en realizar as obras públicas nos municipios nos que o Partido Popular ocupa a alcaldía. Esa forma arbitraria e indecente de gobernar non castiga aos gobernos municipais que non son afíns, senón que realmente atenta contra os dereitos da cidadanía e o interese xeral, poñendo en serio risco a seguridade e integridade física de milleiros de condutores e peóns, como sucede nas estradas autonómicas de Oleiros, que son as vías principais do concello.

Nos vindeiros días colocaranse máis carteis para seguir denunciando esta situación.