Continúa en marcha o proceso de renovación das redes de abastecemento de auga máis antigas. Xa están finalizadas as obras de Nós, na avenida Salvador Allende, e da Costa da Tapia, a tubaxe xeral de entrada ao municipio. En breve rematarase o tramo Oleiros- A Pezoca e nos próximos días iniciarase tamén a conexión desde o depósito da Edreira ata Oleiros. Ademais, no presente ano finalizarase a renovación da tubaxe xeral de Montrove, desde Lamastelle ata Perillo, e a rúa Talagra, en Dorneda.

Executaranse máis obras de substitución de tubaxes con cargo á empresa municipal AquaOleiros: rúas Anduriñas, do Campo, Benito Vicetto e Cruceira. Tamén se vai renovar por completo a rede na zona do Couto, en Dorneda, e iniciarase o cambio da rede xeral de Mera, desde o depósito de Breixo. O investimento total de todas estas actuacións supera os 5 millóns de euros.

O Concello de Oleiros conta cunha ampla rede de abastecemento de auga dotada de 432 km e dotada con 11 depósitos, que se atopan en constante proceso de mellora, destinando todos os anos importantes recursos económicos á súa renovación. Nas obras das tubaxes vanse priorizando aqueles tramos nos que se producen máis roturas, normalmente os de maior antigüidade.