Ante as informacións verquidas sobre “a xestión realizada co presidente da Deputación para a cesión de estradas” lémbralles que esa competencia é exclusiva do Goberno Local
“A xestión da actividade municipal do Concello de Ordes é unha función que corresponde unicamente ao Goberno Local. Ningún grupo político ten potestade para tomar decisións ou levar a cabo trámites cuxa competencia é exclusiva da Alcaldía de Ordes, tal e como establece a lei”. Son palabras de José Luis Martínez Sanjurjo, rexedor ordense, a colación da información publicada en diversos medios “da xestión cos socialistas de Ordes están a realizar co presidente da Deputación da Coruña, Valentín Gozález Formoso, para a cesión ao Concello de varios tramos de estradas provinciais con carácter urbano”. O xeito de proceder é considerado no só “inapropiado” por parte do Goberno de Ordes, senón tamén de “totalitario ao saltar por riba dos representantes que, mediante sufraxio e libremente, elixiu a cidadanía”.
Ante este tipo de actuacións Martínez Sanjurjo solicita “maior rigor e lealdade institucional, tanto para o propio Concello como para o resto dos compoñentes que conforman a corporación municipal”. O alcalde recórdalle a Verónica Gómez, única concelleira socialista que nesta lexislatura ten representación no salón de plenos, que a dinámica estipulada pola lei establece que as propostas deben ser prensentadas en pleno a través de mocións para coñecemento de todas as forzas políticas e da cidadanía. Tras isto establécese o pertinente debate antes de proceder coa votación. Segundo o resultado acadado pola corporación será responsabilidade do executivo local a súa posta en coñecemento e tramitación, se corresponde, ante os organismos competentes ou demais institucións ou representantes.
A crítica dos membros do Goberno ordense vai máis aló do marco estritamente local, xa que consideran que “non se está a ter ningún reparo á hora de manipular e utilizar a figura do presidente da Deputación da Coruña, con fins partidistas e personalistas”.
