● Seis equipos da contorna disputarán o trofeo nos polideportivos de Curtis e Teixeiro

● Os equipos das escolas deportivas municipais participarán tamén na copa infantil que se xogará o sábado en Boimorto

O Concello de Curtis organiza este domingo a Copa de Fútbol Sala do programa Xogade na categoría benxamín, unha cita que reunirá a seis equipos nunha xornada para impulsar a convivencia e o deporte base.
Os encontros disputaranse nos polideportivos de Curtis e Teixeiro, cun formato de partidos de 25 minutos. A fase de grupos arrancará ás 10:00 horas de maneira simultánea nas dúas sedes. O pavillón de Teixeiro albergará os partidos do grupo A, integrado polo Curtis A, Alameda Xarío e Carral, mentres que no polideportivo de Curtis competirán os equipos do grupo B: Boimorto, Curtis B e Alameda Xarío F.
A partir das 12:00 horas desenvolverase a fase final, xa cos seis equipos no polideportivo de Curtis. A final do torneo disputarase ás 13:00 horas e, posteriormente, ás 13:30, terá lugar a entrega de premios.
Ademais, as escolas deportivas municipais participarán tamén na Copa de Fútbol Sala da categoría infantil o sábado 23 en Boimorto. Viaxarán ata alí dous equipos que disputarán o trofeo cunha formación do Concello de Boimorto e outra do Concello de Frades. O torneo desenvolverase en formato de liguiña a partir das 10:00 horas.