A Asociación Ambar das Persoas con Diversidade Funcional estivo esta mañá na Pobra levando a cabo unha xornada clave de aprendizaxe e prevención do suicidio.

O salón de actos da biblioteca municipal encheuse nunha mañá marcada pola escoita activa, a sensibilidade e a necesidade de romper tabús en torno a unha realidade complexa pero da que é urxente falar. A xornada foi impartida pola psicóloga Carmen Hermo.

Catro piares para salvar vidas

Durante dúas horas de intensa formación e intercambio de experiencias, as persoas participantes puideron adquirir coñecementos e ferramentas prácticas divididas en catro bloques esenciais:
• Acompañamento pos-intento: Como coidar, apoiar e soster de xeito seguro a unha persoa que pasou por intentos autolíticos.
• Entender a realidade: Desmitificar e comprender mellor o que supón a morte por suicidio no noso contexto actual.

• Identificar os factores de risco: Aprender a detectar os sinais de alerta e entender as causas subxacentes de por que se chega a esta situación.
• Ferramentas de prevención: Claves prácticas para actuar a tempo dende o tecido social e familiar.

A resposta do público demostra que a prevención non é só unha tarefa clínica, senón un compromiso colectivo. Crear espazos coma este, onde se poida aprender a coidar mellor de nós mesmos e dos que nos rodean, é o primeiro paso para construír unha sociedade
máis empática e segura.

Esta actividade foi posible grazas ao apoio da Xunta de Galicia, a través da Consellería de Política Social e Igualdade, e ós Fondos Europeos da Unión Europea.