A alcaldesa destacou o papel do club como referente do fútbol feminino de base e exemplo dos valores do deporte na cidade

A alcaldesa da Coruña, Inés Rey, e o concelleiro de Deportes, Manuel Vázquez, recibiron esta tarde no Palacio Municipal de María Pita ao Victoria Club de Fútbol para felicitar ao equipo sénior feminino polo seu histórico ascenso á 2ª RFEF, terceira categoría do fútbol feminino estatal. O conxunto coruñés logrou o ascenso tras superar ao Real Zaragoza nunha eliminatoria moi esixente, culminada cunha brillante vitoria por 2-1 na antiga Lei.

Durante a recepción institucional, Inés Rey puxo en valor “o enorme traballo colectivo realizado polo club durante todos estes anos”, destacando que o ascenso “é o premio ao esforzo, á constancia e á aposta decidida polo deporte de base e pola formación en valores”. A alcaldesa salientou ademais o papel do Victoria como “un dos grandes referentes do fútbol feminino galego”, cun proxecto deportivo e social que conta con máis de 120 nenas e preto de 600 licenzas federativas.

A rexedora tamén quixo felicitar ao corpo técnico, ás familias, ás persoas colaboradoras e á directiva da entidade, con especial mención ao presidente do club e da AFAC, Juan Vázquez, “polo seu compromiso constante co deporte coruñés e co fútbol base”. Rey subliñou que “o Victoria leva o nome da Coruña por toda España transmitindo valores como a humildade, o compañeirismo e o traballo en equipo”.

O Concello recoñeceu tamén o gran momento deportivo que atravesa a entidade, con opcións de permanencia para o primeiro equipo masculino e de novos ascensos nas categorías inferiores e no segundo equipo feminino. “O do Victoria non é casualidade, é o resultado dun proxecto sólido e dunha maneira exemplar de entender o deporte”, concluíu a alcaldesa.