Catalina e na rúa da Estrella, a partir do luns 11

Esta fase de traballos rematará a finais de mes e, ata entón, habilitarase un acceso provisional á rúa da Estrella a través de Mantelería, co obxectivo de facilitar servizos de carga e descarga e a entrada a garaxes

As obras de remodelación dos Cantóns avanzan a bo ritmo e enfilan xa unha nova fase de actuacións que, a inicios da semana que vén, se focalizará na rúa Santa Catalina e na súa contorna.

A alcaldesa, Inés Rey, contextualizou esta quenda de traballos, “necesaria para completar a pavimentación de Santa Catalina entre Durán Loriga e os Cantóns”. Estas tarefas son fundamentais para reconfigurar este treito, que pasará a ser totalmente peonil, para lle dar continuidade a un percorrido natural a pé desde a praza de Mina ata a rúa Real.

A previsión da dirección de obra dos Cantóns é que os traballos nesta parte de Santa Catalina comecen o vindeiro luns 11 de maio, o que esixirá cortar o tráfico no acceso á rúa da Estrella ata o día 26 deste mes. De todos os xeitos, manterase en todo momento a accesibilidade peonil e, dado que á rúa da Estrella é zona de paso de servizos de carga e descarga dos establecementos hostaleiros e tamén hai garaxes, habilitarase un acceso provisional desde San Andrés, a través da rúa Mantelería.

Cómpre lembrar que, nesta fase de obras, o corte do tráfico en Santa Catalina só será efectivo na intersección entre a rúa da Estrella e os Cantóns. A circulación de vehículos que saen de Durán Loriga e xiran á esquerda en dirección á rúa San Andrés seguirá estando habilitada, como ata agora.