• Os populares denuncian a falta de xestión do goberno tripartito ante unhas obras urxentes para as parroquias
• Rivadulla esixe celeridade e acusa ao executivo local de manter o Concello “bloqueado e inoperativo”

O Partido Popular de Arzúa vén de criticar con dureza o atraso do inicio das licitacións, publicadas este martes, do goberno local para a execución das obras do POS (Plan de Obras e Servizos) da Deputación da Coruña por un importe de máis de 520.000 euros, ao considerar “inaceptable” a tardanza acumulada na súa posta en marcha.
Os populares lembran que a maioría destas actuacións foron aprobadas no pleno ordinario do 31 de xaneiro de 2024, nun contexto no que xa existía unha situación “case insostible” en moitas pistas e infraestruturas municipais. “É unha mágoa que unhas obras necesarias e urxentes leven máis de dous anos de atraso, mentres os veciños teñen que seguir sufrindo as consecuencias do abandono do Concello”, sinalou o portavoz popular, Rafael Rivadulla.
Desde o PP denuncian que, durante todo este tempo de espera, o goberno tripartito non foi quen de adoptar nin sequera medidas provisionais. “Pedimos en repetidas ocasións que se fixeran reparacións puntuais e parcheos nos puntos máis deteriorados, sabendo que os prazos ían ser longos, pero non houbo resposta. Esa falta de xestión tradúcese en máis problemas e máis custos para os veciños”, engadiu Rivadulla.
Para os populares, esta situación evidencia unha clara incapacidade do executivo local para planificar e executar investimentos básicos. “Estamos ante un goberno con prioridades equivocadas, máis pendente doutros debates que de resolver os problemas reais do día a día”, afirmou.
O portavoz popular tamén advertiu de que o ritmo actual de execución non permite ser optimistas de cara ao futuro. “Moito nos tememos que, aínda que intenten acelerar obras de cara ás eleccións de 2027, o nivel de incompetencia é tal que deixarán moitas actuacións sen facer”, indicou.
Rivadulla concluíu esixindo un cambio inmediato na xestión municipal: “É hora de que o goberno tripartito colla o touro polos cornos e se poña a desatrancar un Concello totalmente inoperativo e bloqueado. Arzúa non pode seguir esperando”.