As persoas interesadas en participar nos Premios SELIC de creación literaria poderán presentar as súas propostas en galego nos xéneros de narrativa, poesía, teatro e ensaio ata o vindeiro 10 de setembro. As obras deben ser inéditas e ter Santiago de Compostela como marco da acción ou referencia fundamental.

O Concello abre este xoves o prazo de presentación dos Premios SELIC de creación literaria 2026
O Boletín Oficial da Provincia (BOP) publica este mércores a convocatoria e as bases reguladoras dos Premios SELIC de creación literaria 2026, que convoca o Concello de Santiago co obxectivo de incrementar a presenza de Compostela na literatura escrita en galego.

O premio ten unha dotación económica de 6.000 euros e implica a publicación da obra gañadora na colección SELIC que edita o Concello. Poden optar a el obras inéditas escritas en galego tanto nos xéneros de narrativa, poesía, teatro e ensaio.

Do 23 de abril ao 10 de setembro

O prazo de recepción de orixinais ábrese este xoves 23 de abril, ao día seguinte da publicación da convocatoria no BOP, e remata o 10 de setembro deste ano. Terán que enviarse ao Concello de Santiago de Compostela (apartado de correos 10. 15.780 Santiago de Compostela) en arquivo dixital editable e en papel, xunto cun sobre pechado identificado mediante lema ou pseudónimo que debe conter os datos da obra e da súa autoría.

O xurando estará composto por cinco persoas representativas do sistema literario galego. O veredicto farase público no mes de decembro.