 Colocaranse vinilos en baixos sen actividade con imaxes de recursos turísticos

Baixo a premisa de mellorar a estética das rúas, o Concello de Ribeira pon en marcha unha iniciativa para o embelecemento de escaparates de locais baleiros para así erradicar o “feísmo” a causa de cartelería excesiva e obsoleta.

En consecuencia, promóvese a limpeza e acondicionamento destes baixos comerciais sen actividade e a colocación de vinilos de alta calidade e rotulación homoxénea con imaxes promocionais dos recursos turísticos de Ribeira, o cal redunda na difusión turística mediante soportes alternativos e na dinamización comercial ao mesmo tempo que se fomenta a participación cidadá ao involucrar á cidadanía no coidado do pobo.

O Concello asumirá con fondos propios a elaboración e o deseño dos distintos vinilos, así como o custe da colocación dos mesmos mentres estes baixos non conten con actividade económica.
“Xa no mes de novembro nos comprometemos nunha reunión cos socios da Asociación de Empresarios a traballar nunha campaña de mellora estética dos espazos públicos; unha medida que estivemos perfilando nestes meses. Cumprimos así a nosa palabra con esta nova iniciativa de embelecemento que se suma ao incremento da ornamentación vexetal. E isto non só embelece as nosas rúas, tamén sirve para poñer en valor os nosos recursos turísticos empregando soportes alternativos”, en palabras da alcaldesa, María Sampedro.

Preténdese así restaurar a imaxe urbana, regular a cartelería e publicidade, dar cumprimento a ordenanza de colocación de carteis, revitalizar os locais baleiros e sensibilizar a propietarios e anunciantes sobre a responsabilidade no mantemento das propiedades privadas.

Participación na medida

Nesta iniciativa poderán tomar parte calquera persoa propietaria dalgún local comercial situado no termo municipal de Ribeira e que, no momento da solicitude, estea baleiro e inactivo. Os escaparates terán que cumprir unha serie de condicións mínimas de limpeza e conservación que permita a colocación do vinilo no seu cristal.

A participación será de balde e poderase formalizar no prazo dun mes dende a publicación da información na páxina web municipal www.ribeira.gal mediante enderezo electrónico a comercio@ribeira.gal, co Anexo I cuberto e a seguinte documentación: copia do DNI/CIF, acreditación da propiedade e mínimo dunha fotografía da fachada do local con indicación do tamaño do escaparate.

O Concello de Ribeira avaliará tódalas solicitudes e seleccionará aqueles escaparates que considere axeitados para a posta en marcha da iniciativa atendendo as criterios de localización, tamaño, distribución equitativa polas rúas ou adecuación aos vinilos dispoñibles, entre outras cuestións.