• Advirte de que a falta de transparencia limita o control da oposición e o dereito dos veciños a saber en que gástase o diñeiro público
• Izaskun García: “Despois do que sinalou o Consello de Contas, que o alcalde siga ocultando información e esquivando controis é aínda máis grave e irresponsable”

O PP de Culleredo rexistrou hoxe no Concello un escrito no que volve esixir ao goberno local a regularización inmediata da publicación dos contratos menores, tras denunciar en numerosas ocasións a falta de actualización desta información. Os populares consideran que se trata dunha situación “moi grave” que retrata a forma de gobernar de José Ramón Rioboo, baseada na opacidade e o bloqueo ao control público da xestión municipal.
O PP lembra que a lei obriga a publicar trimestralmente este tipo de contratos na Plataforma de Contratación do Sector Público, pero que a última publicación completa realizada polo Concello foi o 17 de xullo de 2024, cando difundiu os contratos do primeiro e segundo trimestre dese ano. Desde entón, só figuran datos parciais: seis contratos correspondentes ao terceiro e cuarto trimestre de 2024, 28 contratos en todo 2025 e nove no que vai de 2026. “Non é un simple atraso administrativo. É falta de transparencia. E non é casual, o que nos leva a pensar que hai moito que esconder”, sinala Izaskun García, portavoz popular.
García enmarca esta situación nun contexto aínda máis preocupante tras o informe do Consello de Contas de 2025, que xa puxo o foco sobre a contratación municipal de Culleredo. “Despois do que sinalou o Consello de Contas, que o alcalde siga ocultando información e esquivando controis é aínda máis grave e irresponsable”, advirte.
Desde o PP insisten en que a falta de publicación da contratación menor impide coñecer con claridade como se xestiona unha parte da contratación municipal, a quen adxudícanse eses contratos e con que continuidade, dificultando así o labor de fiscalización da oposición e limitando tamén o dereito dos veciños para acceder a información pública. “O que non se publica non se pode controlar. E cando falamos de contratos, de adxudicacións e de diñeiro público, esa opacidade non é menor: é gravísima”, engade García.
Para os populares, Culleredo non pode seguir funcionando cun goberno que incumpre as súas obrigacións de transparencia e dá explicacións tarde, mal e só cando se lle obriga. Por iso, esixen ao executivo de Rioboo que deixe de esquivar controis, publique de inmediato toda a información pendente e garanta unha xestión municipal máis limpa e transparente.