Este luns, 20 de abril, abrirase o prazo de presentación de ofertas para a adquisición de 41 parcelas de chan empresarial situadas no Polígono Industrial da Rega, en Ortigueira. Trátase de terreos de titularidade autonómica pertencentes á Oferta Pública Permanente de Xestión do Só de Galicia (XESTUR, S.A.).
Este proceso, impulsado pola Xunta de Galicia, ten como obxectivo principal regular a venda de parcelas permitindo formas flexibles de pago. Con iso búscase facilitar o asentamento de novas empresas, posibilitar a ampliación das xa existentes e converter a zona nun polo de atracción de novas industrias, favorecendo a xeración de emprego.
O modelo de adxudicación desta oferta pública permanente establece un marco moito máis favorable para autónomos e tecido empresarial. Entre estas condicións destacan a regulación da venda admitindo formas de pago flexible ou ofertas á baixa; a aplicación de prezos bonificados como mínimos para as parcelas con pago flexible; ou a admisión de ofertas á baixa para determinadas parcelas.
Calquera persoa física ou xurídica pode presentar a súa solicitude. Ademais, poderán presentarse ofertas tanto de forma individual como conxunta, sempre que estas últimas sexan sobre parcelas lindeiras.
Presentación de Proposicións
O procedemento establece que, unha vez recibida unha oferta, Xestur publicaraa na súa páxina web. A partir dese momento, abrirase un prazo de 15 días durante o cal poderán presentarse ofertas distintas sobre esa mesma parcela. As parcelas que non se adxudiquen manteranse en oferta permanente ata a súa adxudicación.
As proposicións deben presentarse polas seguintes vías: no Rexistro Xeral da Xunta de Galicia, no Edificio Administrativo de San Caetano (Santiago de Compostela); en calquera dos lugares establecidos no artigo 16.4 da Lei 39/2015, do 1 de outubro, dirixido a Xestión do Só de Galicia-Xestur, S.A., Complexo Administrativo San Lázaro #s/n, 15703, Santiago de Compostela.
En caso de presentar as ofertas en lugares diferentes ao rexistro da Xunta, é obrigatorio remitir o mesmo día da presentación un correo electrónico a xestur@xesturgalicia.com. No correo débese indicar a presentación da oferta e o lugar onde se realizou.
Para consultar o prego de bases completo, os interesados poden acceder á páxina oficial: www.xesturgalicia.com.