A gran celebración cinematográfica terá lugar do 7 ao 10 de abril no Teatro Colón e na Domus

O acceso ás proxeccións será gratuíto, con entrada libre ata completar capacidade

A Coruña acollerá do 7 ao 10 de abril a VII Semana do Cinema Galego, a gran celebración cinematográfica non competitiva que exhibe o máis salientable da produción audiovisual galega recente. Ao longo de catro xornadas, o público poderá gozar de oito filmes en sesións gratuítas no Teatro Colón e na Domus.

A alcaldesa, Inés Rey, presentou esta nova edición no Teatro Colón, acompañada por Lucía Regueiro, membro da directiva da Academia Galega do Audiovisual. “A Semana do Cinema Galego garante o acceso da cidadanía ás mellores producións galegas, amosando que o noso cinema está máis vivo ca nunca e ten aspiracións moi altas”, sinalou Rey, que lembrou que A Coruña aspira a formar parte da Rede de Cidades Creativas da UNESCO na categoría de cinema e audiovisual co obxectivo de “visibilizar un ecosistema audiovisual e cinematográfico consolidado, con empresas de referencia, infraestruturas especializadas, capacidade para acoller rodaxes de todo tipo e talento creativo recoñecido”. Nese sentido, destacou o traballo de persoas creadoras e artistas coruñesas como Ángeles Huerta, Óliver Laxe, Alberto Vázquez ou Cris Iglesias.

A programación está composta polas longametraxes finalistas dos Premios Mestre Mateo nas categorías de mellor longametraxe de ficción e mellor documental, convertendo a mostra nun escaparate privilexiado do mellor cinema galego do último ano. As proxeccións estarán acompañadas por presentacións dos equipos dos filmes, que introducirán as obras e conversarán co público, convertendo cada sesión nun espazo de encontro co cinema galego contemporáneo.

A VII Semana do Cinema Galego botará a andar o martes 7 de abril no Teatro Colón coa proxección de ‘Sirât’, de Oliver Laxe, ás 19.00 horas. O filme, fito histórico do audiovisual galego ao ser finalista aos Premios Oscar, conseguiu esta fin de semana o Premio Mestre Mateo a Mellor Longametraxe. Segue a un home e ao seu fillo na procura dunha moza desaparecida nunha rave en Marrocos, nunha viaxe marcada pola música electrónica e a busca desesperada. A xornada completarase ás 21.00 horas con ‘As liñas descontinuas’, de Anxos Fazáns, unha historia sobre o encontro inesperado entre dúas persoas en momentos vitais moi distintos que transformará as súas vidas.

O mércores 8 de abril, tamén no Teatro Colón, será a quenda de San Simón (19.00 horas), de Miguel Ángel Delgado, que recupera a memoria da illa convertida en campo de concentración durante o franquismo. Ás 21.00 horas proxectarase ‘Antes de nós’, de Ángeles Huerta, un retrato íntimo de Castelao e Virxinia a través de dous momentos clave das súas vidas, marcado pola perda e a reconstrución do vínculo.

A programación trasladarase á Domus o xoves 9 de abril, onde se poderá ver ‘Deuses de pedra’ (19.00 horas), de Iván Castiñeiras, unha historia de crecemento situada nunha escola rural na fronteira entre Galicia e Portugal. Ás 21.00 horas será a quenda de ‘Ao son da nova regueifa’, de Manolo Maseda e Saúl Rivas, un documental que percorre Galicia para explorar a evolución contemporánea da regueifa, entre tradición e modernidade.

O venres 10 de abril, tamén na Domus, a xornada comezará con ‘O silencio herdado’ (19.00 horas), de Lucía Dapena González, unha peza íntima sobre a memoria, os silencios familiares e a dificultade de nomear o pasado. Pechará a programación ‘360 curvas’ (21.00 horas), de Alejandro Gándara Porteiro e Ariadna Silva Fernández, e Premio Mestre Mateo a Mellor Documental. A obra toma como punto de partida a estrada entre A Fonsagrada e Lugo para reflexionar sobre o declive e a resistencia do rural galego.

Un total de oito filmes repartidos en catro días que ofrecen unha ampla panorámica da creación audiovisual galega actual, tanto na ficción como no documental, con propostas que abordan cuestións como a memoria histórica, a identidade, o rural ou as transformacións sociais.

Na súa pasada edición, a Semana do Cinema Galego reuniu unha media de arredor de 300 espectadores por xornada, reafirmando o interese do público polas producións galegas e consolidándose como unha das citas imprescindibles do calendario cultural. Ademais, todas as proxeccións contaron coa participación dos equipos dos filmes, favorecendo o diálogo directo entre creadoras, creadores e público.