· O Concello aduce seis causas de nulidade e esixe unha avaliación de impacto ambiental conxunta con todos os parques eólicos asociados

O Concello de Abegondo presenta un recurso de alzada contra a autorización do parque de 220 quilowatts na subestación eléctrica prevista por Rede Eléctrica na parroquia de Folgoso. A Dirección Xeral de Planificación Enerxética e Minas deu luz verde á construción da infraestrutura no municipio, ademais de declarar a utilidade pública do proxecto.

Este parque de 220 quilowatts integrarase na futura subestación de 400/220 quilowatts, unha instalación validada polo Estado que o goberno local xa ten recorrida desde finais de 2025. Tanto o Concello como os veciños mostraron o seu rexeitamento total á actuación polo impacto que supoñerá sobre o territorio.

“Faise sen consenso social e supón un impacto irreversible ao medio ambiente”, afirma o alcalde, José Antonio Santiso, que recalca que “non pararemos ata esgotar todas as vías e todas as posibilidades contra esta barbaridade”. O primeiro edil exercerá unha defensa rotunda dos dereitos dos seus veciños fronte a unha construción “inxustificada”.

En concreto, no recurso de alzada, o Concello demanda a nulidade de pleno dereito da resolución por varias causas como a falta de avaliación do impacto ambiental. Neste sentido, considera que se está vulnerando a lei 21/2013 así como o Dereito da Unión Europea.

Así mesmo, sublíñase que a presenza do parque no territorio da Reserva de Biosfera Mariñas Coruñesas implica de seu que debe ser obxecto de avaliación ambiental. En canto a afeccións, o Concello relata no recurso o impacto que se exercerá sobre o medio natural, a fauna e a flora, que poderían ser irreversibles, alerta.

Tamén fai fincapé no control necesario de especies invasoras, o incremento do risco de incendios forestais, ou as afeccións sobre a paisaxe e a hidrología, entre outros aspectos analizados.

Más causas de nulidade

Ademais da falta de impacto ambiental, o Concello aduce máis causas para fundamentar a petición de nulidade. É o caso da fragmentación de proxectos, polo que se ve necesario unha avaliación conxunta coa liña de transporte e os parques eólicos aos que vai dar servizo.

No texto, os xuristas apuntan que a subestación “non pode ser considerada illadamente desde o punto de vista ambiental respecto doutros proxectos que se relacionan directamente coa mesma, formando materialmente parte dun conxunto”, dado que ao facelo así “se prescinde dunha avaliación ambiental do conxunto e dos correspondentes estudos de efectos acumulativos e sinérgicos, situámonos #ante unha fragmentación artificiosa de proxectos contraria ao dereito”.

O Concello expón que se solicitaron e proxectado por parte de diferentes compañías eléctricas un gran número de proxectos de parques eólicos e as súas infraestruturas de evacuación (algúns deles aprobados, outros rexeitados e outros en fase de resolución) que no seu conxunto causarían un enorme, irreversible e irreparable impacto ambiental.

O goberno local considera imperativo unha avaliación conxunta de todas as instalacións eólicas que se pretende poñer a información pública e que teñen previsto verter á rede no punto de conexión Subestación 400/220 kv. Igualmente, falta a realización dunha xustificación a nivel científico – técnico polo exceso e abuso de Liñas de Alta Tensión para o transporte de enerxía de diferentes parques eólicos (Seixo, Feás-Seselle, Satrebares,..) cuxos proxectos se están tramitando pero que van confluír ao mesmo punto) e que permita determinar a carga crítica capaz de soportar o territorio da Reserva de Biosfera e os seus habitantes, algo que a día de hoxe descoñécese.

Como respaldo #ante esta petición, o Concello sinala a existencia de numerosa xurisprudencia.

A maiores, as outras causas de nulidade relatadas consisten na falta de toma en consideración das alegacións do Concello de Abegondo, a vulneración da normativa urbanística municipal, a falta de xustificación de utilidade pública e a falta da #poñer# ao dispor dos informes sectoriais.

En base a estas seis causas, o Concello demanda á Dirección Xeral, do mesmo xeito que pediu ao Estado co parque de 400 kv, que declare a nulidade da resolución e suspéndase a súa execución polos prexuízos que causará de imposible reparación.

O goberno local non se rende #ante o que define como “un despropósito”. Hai que lembrar que, nas súas orixes, o proxecto constaba como un reforzo para a alimentación eléctrica da cidade da Coruña. Con todo, a obra adquire outra dimensión que se xustifica agora pola subministración de electricidade ao AVE e a evacuación da enerxía procedente dos parques eólicos.