A directora de Turismo de Galicia, xunto co presidente da Deputación de Ourense e o director de Unipublic asistiron á grabación do spot oficial de La Vuelta Ciclista a España 2016
A directora de Turismo de Galicia, Nava Castro, o presidente da Deputación de Ourense, José Manuel Baltar, e o director de Unipublic, Javier Guillén, visitaron o Balneario de Laias para asistir á grabación do spot oficial de La Vuelta Ciclista a España 2016.
A canción oficial desta nova edición, que servirá tamén de base para o spot de promoción do evento, estará interpretada pola cantante galega Marta Sánchez e contará coa participación de dous artistas galegos, Daniel Minimalia e Anxo Lorenzo e o humorista David Amor.
Durante a visita a directora de Turismo de Galicia sinalou que Marta Sánchez é a artista perfecta para poñer voz a esta nova edición de La Vuelta Ciclista xa que, ademais de contar con numerosos seguidores e un gran prestixio, tal e como avalan os seus trinta anos como artista e os máis de 8 millóns de discos vendidos, é unha recoñecida artista galega.
Así mesmo, Nava Castro destacou que a gravación do anuncio promocional se rodará integramente na Comunidade galega e a emisión do anuncio en Televisión Española estenderase entre os meses de xullo e setembro constituíndo, segundo sinalou, “unha importante carta de presentación de Galicia como destino a nivel nacional”.
Por outra parte, resaltou que a nosa comunidade ocupará un lugar moi destacado neste gran acontecemento deportivo recordando que Galicia será o punto de partida deste evento que conxuga a competición coa promoción turística do lugares polos que discorre.
“Neste ano, Galicia mostrará de novo todo o seu esplendor a miles de espectadores de La Vuelta Ciclista cunha edición que non deixará a ninguén indiferente”, afirmou Nava Castro.
Gran repercusión
A responsable de Turismo da Xunta fixo referencia á gran repercusión que xerou a última edición de La Vuelta Ciclista en Galicia.
Neste senso, afirmou que tanto na saída coma durante a carreira ou na meta de cada unha das etapa, a nosa comunidade contou cun nivel de participación masiva, rexistrando máis de 2 millóns de público.
Así mesmo, Nava Castro sinalou que esta competición deportiva foi seguida por un gran número de espectadores a través das pantallas de varios países do mundo, acadando a cobertura internacional un total de 190 países dos cinco continentes.
