Santiago Freire explica que “o tenente de alcalde presumiu en Pleno que por primeira vez había liquidación no mes de febreiro e, cando días despois pedimos esa información, o alcalde negounos o acceso argumentando que non estaba elaborada”

O PP de Noia denuncia a constante vulneración dos seus dereitos de acceso á información municipal por parte do Goberno do PSOE e a Marea, o que dificulta o exercicio do seu dereito fundamental á participación política e á fiscalización da xestión do Goberno. “Durante os sete meses que levamos de desgoberno en Noia, PSOE e BNG non só non cumpriron co prazo de cinco días, senón que tamén incumpriron a súa obriga de facilitar a información solicitada por este grupo municipal para desenvolver o seu traballo de oposición”, denuncia o voceiro e presidente local do PP de Noia, Santiago Freire, quen indica que “agora demos un paso máis, o da mentira, co caso da liquidación da Conta Xeral de 2025”.

No pasado mes de febreiro, en resposta a preguntas do voceiro do PP sobre o Remanente de Tesourería para Gastos Xerais contemplado na liquidación da Conta Xeral de 2025, o tenente de alcalde e concelleiro de Economía respondeu que “por primeira vez no mes de febreiro hai liquidación do orzamento, algo que debe ser unha novidade para vostede” e detallando que o Remanente de Tesourería para Gastos Xerais ascendía a 1,1 millóns de euros e o Remanente Xeral era de 1,4 millóns de euros.

Acto seguido, a concelleira popular Laura Salgado García solicitou copia desa resolución de aprobación da liquidación da Conta Xeral do 2025 á que fixo referencia o tenente de alcalde da Marea. Unha petición denegada polo alcalde nunha Resolución da Alcaldía na que argumentaba que “a información solicitada trátase dunha información non elaborada na actualidade debido a que a Conta Xeral do ano 2025 ten prazo de aprobación ata o día 1 de outubro de 2026, segundo o artigo 212.4 da Lei Reguladora de Facendas Locais”.

“Deixando a un lado que esta argumentación non é correcta, xa que nós pedíamos a Liquidación da Conta Xeral, cuxo prazo legal para presentala remata o 31 de marzo, e non o documento completo da Conta Xeral, que si ten ese prazo que indica o alcalde”, apunta Freire Abeijón, “o que está claro é que aquí alguén están mentindo. Ou o tenente de alcalde lle mentiu ao Pleno cando presumiu de ter aprobada a liquidación en febreiro ou o alcalde minte nunha Resolución da Alcaldía cando di que esa liquidación non está elaborada ou se atopa en curso de elaboración”.

Boa xestión popular

Unha situación que non é nova para o Partido Popular, pois “o PSOE e a Marea levan anos mentindo sobre a situación económica do Concello de Noia para tratar de xustificar a moción de censura cun tránsfuga e co beneplácito do BNG. Presumen de transparencia e responsabilidade, pero despois ocultan a información. Falaban dun concello en quebra e resulta que temos máis de 1,1 millóns de euros para gastos xerais e todos os indicadores económicos que se levan a pleno corroboran a boa xestión do Goberno do Partido Popular”.

Se comprobamos os dous últimos exercicios, o resultado orzamentario axustado de 2024 ascendeu a 770.767,64 euros; mentres que o de 2025 foi de 36.784,61 euros, en ambos os dous casos positivos. Sen embargo, fixo fincapé no período medio de pago a provedores, que foi do 7,89 no primeiro trimestre de 2025, 10,21 no segundo e 14,25 no terceiro baixo mandato popular e que se disparou ao 23,45 no cuarto. “Nos catro casos estamos sempre por debaixo do esixido pola lei, polo que non é certo que houbera risco de impagos como dicían PSOE e Marea durante a súa propaganda previa á moción de censura”, sinala Santiago Freire.