A competición reunirá arredor de 260 patinadores e patinadoras de 14 clubs da provincia da Coruña nunha cita clave para o impulso do deporte base

O pavillón municipal de Monte Alto será escenario esta fin de semana, os días 21 e 22 de febreiro, da I Fase de Niveis de Patinaxe Artística – Coruña Norte, organizada polo Concello da Coruña en colaboración coa Federación Galega de Patinaxe.

Na sede coruñesa, a competición desenvolverase en tres xornadas independentes: o sábado en horario de mañá (de 10.00 a 14.30 horas) e de tarde (de 16.30 a 21.30 horas), e o domingo en horario de mañá (de 10.00 a 14.30 horas). Está prevista a participación aproximada de 260 patinadores e patinadoras procedentes de 14 clubs da provincia da Coruña.

Trátase dunha competición de base cuxo obxectivo é fomentar a práctica deportiva e favorecer o desenvolvemento técnico do patinaxe artístico desde as primeiras etapas formativas, contribuíndo á consolidación de valores como o esforzo, a disciplina e o compañeirismo.

O concelleiro de Deportes, Manuel Vázquez, destacou a importancia de apoiar este tipo de iniciativas: “O deporte base é unha prioridade para este Concello. Probas como esta permiten que centos de rapazas e rapaces teñan a oportunidade de competir, medrar e gañar experiencia nun entorno organizado e seguro, fortalecendo ademais o tecido deportivo da nosa cidade”.

A celebración desta fase na Coruña reforza o compromiso municipal co impulso do deporte formativo, liña estratéxica recollida nas políticas impulsadas polo Goberno de Inés Rey para promover hábitos de vida saudables e facilitar o acceso ás instalacións deportivas municipais.