Aínda que a meteoroloxía quixo ser a protagonista da xornada, as gañas de Entroido e de festa da veciñanza impuxéronse a unha chuvia continua e intensa durante toda a xornada. Algo que agradeceron especialmente dende a Comisión de Festas de Lamas (Sergude), con mención especial para as persoas que percorreron a parroquia durante a mañá formando parte dos Correos, Xenerais e Comparsas cos seus cantos de taberna e acompañados polo grupo local “Son de Gaita”.

Unha meteoroloxía que tamén complicou o acceso ao campo da festa, onde a gran carpa instalada volveu encherse un ano máis coa música da Parranda e os Coros do Entroido, que deron paso aos Atranques dos Xenerais da Ulla. Uns atranques moi aplaudidos polos presentes e onde o bo humor estivo presente en todos os temas tratados, dende os problemas que houbo o ano pasado coa comisión de festas ata cuestións municipais, con especiais referencias ao plan de sendas do Concello de Boqueixón.