Onte comezaron os traballos para derrubar o galpón situado no cruzamento entre ambas as rúas, o que permitirá dar resposta a unha demanda da veciñanza e unificar a superficie verde alí existente

O Concello iniciou onte os traballos de demolición dun pequeno galpón existente no cruzamento das rúas San Diego e Petín —no percorrido entre A Gaiteira e A Cubela—, unha actuación que forma parte dos compromisos adquiridos polo Goberno de Inés Rey coa veciñanza da zona.

Tal e como informou hoxe a alcaldesa, Inés Rey, a recuperación da superficie que ocupaba o galpón permitirá suprimir un tapón urbanístico que impedía a unificación dun pequeno ámbito axardinado nesta parte do barrio, onde o Concello creou a mediados do ano 2021 un pequeno parque biosaudable.

Xa entón, e debido á existencia de pequenas parcelas privadas neste enclave —fragmentadas—, a ampliación do parque e das áreas verdes lindeiras quedaron suxeitas á adquisición ou expropiación de diversas superficies de titularidade particular. “E estas expropiacións fóronse facendo pouco a pouco, en virtude dos acordos que se foron acadando coas súas respectivas persoas propietarias”, apuntou a rexedora, que fixo fincapé no traballo de continuidade existente á hora de abordar expedientes con propietarios múltiples.

No caso do galpón, a súa adquisición por parte da Administración municipal supuxo, no seu momento, un desembolso de 240.000 euros. Agora, o Concello procede á súa demolición e gaña así máis espazo público no barrio. Unha vez que remate a retirada dos escombros e se nivele o chan, está previsto iniciar as tarefas de adecuación da superficie. Unha das posibilidades que se está a barallar é o seu axardinamento.
“Desta forma, tentamos dar resposta a unha das principais demandas das veciñas e veciños nesta parte do barrio. Cónstanos que era así desde hai tempo e, agora, completamos os trámites para facelo posible”, expuxo Inés Rey.