Os dous xornalistas recibiron os premios nun acto presidido pola alcaldesa, quen destacou a calidade dos traballos e defendeu o xornalismo de calidade como un valor esencial da sociedade

Os xornalistas Xurxo Fernández e Sofía Vázquez recibiron hoxe, respectivamente, os premios Pérez Lugín e Emilio Quesada polas súas obras “Motivos para perder o tren” e “50 años de Zara: desde Galicia a la conquista del mundo”. Recibiron este recoñecemento nun acto presidido pola alcaldesa Inés Rey no palacio de María Pita. Tamén interveu na entrega Doda Vázquez, presidenta da Asociación da Prensa da Coruña. Os dous premiados exercen a súa profesión en La Voz de Galicia.

A temática do Pérez Lugín deste ano era “Do tren de Lugo ao AVE: 150 anos de ferrocarril na Coruña”. Os traballos presentados debían, co fío condutor da historia e evolución das conexións ferroviarias da cidade, debuxar un relato autoral baixo a forma de calquera dos xéneros xornalísticos. A obra elixida narra, no transcurso dunha semana e con estilo de reportaxe, pequenas historias de viaxantes que pasan pola estación coruñesa. “Subín ao último tren celebrando os 150 anos do primeiro; no momento preciso para que a miña avoíña e a súa bisneta poidan compartir o salón de plenos con este coruñés”, apuntou Fernández.

Dada a actualidade do tema central da edición deste ano, a alcaldesa tivo no seu discurso palabras de recordo para as vítimas do accidente de Córdoba e as súas familias. “O texto de Xurxo Fernández lémbranos que detrás dos mares de xente que navegamos todos os días hai rostros concretos. Historias concretas. Soños concretos. Soños que nun só segundo de dor poden ser arrincados para sempre, como por desgraza pasou hai moi pouco en Córdoba. E pérdense todos eses proxectos e todos eses soños. Só revividos pola memoria dos que se quedan e os que se negan a esquecer. Polos relatos que manteñen as luces prendidas”, dixo.

Premio Cronista Emilio Quesada

Pola súa banda, Sofía Vázquez, gañadora do premio Cronista Emilio Quesada por unha ampla reportaxe que percorre a historia de Zara con motivo do seu 50 aniversario. “O texto é un percorrido detallado pola vida dun dos proxectos empresariais máis exitosos da historia, sempre á vangarda da moda e a innovación”, subliñou Inés Rey. Vázquez mostrouse “emocionada e feliz” de recoller o galardón. “É o meu primeiro premio (ao único ao que me presentei, motivada por unha amiga) e podo dicir que me presentei porque podía defender a miña participación con este traballo sobre os 50 anos de Zara, unha empresa recoñecida, recoñecible polos seus actos e con resortes para o éxito”, dixo.

A alcaldesa puxo en valor a calidade dos traballos premiados e reivindicou o exercicio dun xornalismo libre e de calidade como elemento esencial da sociedade