Turismo de Galicia participa nunha viaxe a China para promover a oferta e os servizos turísticos galegos entre os días 18 e 21 de abril
Un total de 160 profesionais do turismo chinés que representan a 118 empresas operadoras terán a oportunidade estes días de coñecer de preto o destino Galicia a través das presentacións que levará a cabo Turismo de Galicia nas cidades de Hong Kong, Shanghai e Pekín, entre os días 18 e 21 de abril.
A entidade de promoción turística da Xunta promoverá así a oferta e os servizos turísticos galegos, apoiando a comercialización destes, nun dos mercados emerxentes máis interesantes para a Comunidade galega.
Esta actividade, organizada por Turespaña e que se iniciou onte en Hong Kong, contou coa participación de 40 operadores turísticos que representaban a 27 compañías relacionadas coa compra de viaxes organizados nesta cidade.
Turismo de Galicia participará mañá día 20 de abril na presentación e workshop que terá lugar na cidade de Shanghai e na que se espera que participen 50 profesionais do turismo que representan a 41 empresas.
Por último, dentro desta viaxe promocional, o turismo galego presentarase na capital de China, Pekín, onde está previsto que participen 70 axentes de viaxe que representan a 50 empresa turísticas.
Mercado emerxente
No ámbito da promoción turística de Galicia, China constitúe un dos mercados emisores con máis potencial para a Comunidade galega, e neste sentido, Turismo de Galicia ven organizando distintas actividades de difusión da oferta e os servizos turísticos galegos entre os operadores turísticos e o público final dese país.
Ademais destas xornadas de promoción no territorio chinés, a entidade da Xunta de Galicia ten participado en certames turísticos como o Guangzhou International Travel Fair –o mercado turístico máis importante de China- e organizado viaxes de familiarización para que operadores e xornalistas puideran coñecer o noso destino.
En canto ao Camiño de Santiago, desde Turismo de Galicia tamén se organizaron actividades específicas de promoción como unha viaxe para xornalistas que tiveron a oportunidade de percorrer algúns tramos do Camiño francés.
