A nova edición ofrece preto de 350 parcelas e incorpora melloras nas canles de comunicación coas persoas usuarias

O Concello da Coruña abrirá o vindeiro luns, 19 de xaneiro, o prazo para solicitar as cerca de 350 parcelas dispoñibles dentro do programa municipal de hortas urbanas para o período 2026-2029. A través desta nova convocatoria, o Goberno local reafirma o seu compromiso cun modelo de cidade que promova o lecer activo, a cohesión social e o respecto polo medio ambiente.

Nesta edición habilítanse seis espazos públicos para uso hortícola nas seguintes localizacións: parque de San Pedro de Visma (que substitúe ao recinto do Agra do Orzán), Eirís, Novo Mesoiro, parque Adolfo Suárez, parque de Oza e parque Carlos Casares. Estes dous últimos estarán destinados exclusivamente a entidades sen ánimo de lucro e centros educativos.
“Con esta iniciativa, que dá continuidade a unha liña estratéxica xa consolidada, o Concello mantén a súa aposta polas hortas urbanas como ferramenta de participación cidadá e benestar, orientada á promoción da agricultura ecolóxica, a educación ambiental e o contacto interxeracional”, indicou a concelleira de Medio Ambiente, Yoya Neira.

As persoas interesadas poderán consultar as bases da convocatoria na web municipal e presentar a súa solicitude entre o 19 e o 30 de xaneiro, ambos incluídos. A tramitación poderá realizarse en liña a través da sede electrónica ou presencialmente nas oficinas do Rexistro Xeral situadas en María Pita, A Franxa, Fórum Metropolitano e Ágora. Ademais, estará dispoñible o servizo de atención telefónica no número 010, e os modelos normalizados de solicitude poderán descargarse tamén desde a web ou recollerse nas oficinas.

As bases recollen que as persoas usuarias con autorización vixente nas hortas do Agra do Orzán –espazo que desaparecerá debido ás obras do Sector II de San Pedro de Visma– terán preferencia na adxudicación e dereito a recuperar o tempo non gozado, se así o solicitan.

Co obxectivo de garantir a continuidade dos ciclos de cultivo, as parcelas serán entregadas en marzo de 2026 e deberán ser devoltas o 31 de decembro de 2029. Esta planificación permitirá ao Concello realizar as tarefas de mantemento e preparación dos terreos durante os primeiros meses de 2030.

Unha das principais novidades desta convocatoria é que será única para todas as persoas solicitantes, tanto físicas como xurídicas. No caso das persoas particulares, a adxudicación farase seguindo unha orde de prelación baseada na última letra do DNI e nos catro últimos díxitos, para garantir un sistema máis equitativo.

Non poderán optar a unha parcela aquelas persoas ás que se lles revogase o uso en convocatorias anteriores por incumprimento das normas. A normativa establece que só se poderá solicitar unha horta por unidade familiar, entendida como o conxunto de persoas empadroadas no mesmo domicilio. As persoas autorizadas deberán portar un carné identificativo sempre visible durante o uso da horta.

Ademais, en casos xustificados, permitirase designar unha persoa allea á unidade familiar para realizar tarefas básicas de mantemento como rego, limpeza e cultivo. Tamén se contempla a posibilidade de deixar a parcela sen traballar durante un máximo de tres meses, por causas como enfermidade ou desprazamentos temporais, sempre que se comunique previamente. Esta excepción só poderá empregarse unha vez durante a vixencia da convocatoria.

Mellora da comunicación e novos recursos para as persoas usuarias

No marco desta nova convocatoria, ábrense novas canles de comunicación que permitirán ás persoas usuarias consultar dúbidas sobre produtos, resolver conflitos, comunicar renuncias ou recibir información relevante. Os carnés identificativos incluirán un código QR que dará acceso directo á normativa vixente e a avisos actualizados. Xunto coa entrega das chaves das parcelas, facilitarase un pequeno manual co resumo das normas básicas de uso.

Así mesmo, as listas de espera de cada parque estarán dispoñibles e actualizadas periodicamente na web municipal, favorecendo a transparencia e o acceso á información.
Esta nova edición do programa de hortas urbanas forma parte dunha estratexia máis ampla de políticas públicas impulsadas ao abeiro da planificación municipal, nas que o Goberno de Inés Rey vén integrando criterios de sustentabilidade, participación e calidade de vida nos distintos barrios da cidade.