— Esta iniciativa, que aglutina os programas didácticos desenvolvidos desde as diferentes consellerías da Xunta, suma máis de 178.000 alumnos e 8.000 docentes

— Este curso incorpóranse dúas novas propostas centradas na internacionalización dos centros educativos e nos fondos europeos

Un total de 707 colexios e institutos participan este curso nas 40 iniciativas educativas impulsadas pola Xunta a través do Plan Proxecta+. No seu desenvolvemento implícanse máis de 178.000 alumnos e 8.000 docentes de todos os niveis educativos non universitarios.
Liderado pola Consellería de Educación, Ciencia, Universidades e FP, o Plan Proxecta+ aglutina as diferentes iniciativas didácticas que ofertan as consellerías da Xunta en colaboración, nalgúns casos, con outras institucións. Este curso ofértanse 40 programas diferentes, con dúas propostas de nova incorporación.
Por unha banda, Internacionalización do centro educativo en colaboración con eTwinning, impulsado pola Consellería de Educación, persegue fomentar e mentorizar a creación e desenvolvemento de proxectos educativos de colaboración internacional virtual a través da plataforma eTwinning. Por outra, Fondos europeos, da Consellería de Facenda e Administración Pública, consiste no desenvolvemento dun proxecto de innovación educativa que afonde nos principios e os pilares de dereitos da Unión Europea, no fomento da cohesión económica e social dos países membros e das rexións que a conforman e na busca do crecemento e do benestar dos países e da cidadanía.
Os programas ofertados desenvolven as competencias clave completando o currículo educativo, os elementos transversais (como a educación en valores) e os obxectivos para o desenvolvemento sostible promovidos pola Axenda 2030 das Nacións Unidas. Afondan en ámbitos como a arte e o patrimonio, a igualdade e cidadanía, a lingua e a comunicación, a saúde e a sostibilidade e o consumo responsable.
Como é habitual, os programas con máis número de centros integrados son Proxectos de vida activa e deportiva, o incremento diario de actividade física que realiza o alumnado, seguido de Nutriescolas, unha iniciativa para que o alumnado adquira e consolide hábitos alimentarios adecuados e desenvolva as competencias necesarias para facer eleccións saudables no futuro.
O número de centros integrados en cada programa recóllese na seguinte táboa:

 

Programas	Centros participantes
Proxecto de vida activa e deportiva	368
Nutriescolas	104
Donas de si	68
Proxecto Ríos	48
Meteoescolas	41
Proxecto Terra	35
Apuntámonos a non beber	32
Por 365 de respecto e igualdade	32
Quérote+	32
Parlamento xove	27
Proxectos de innovación e dinamización lingüística	25
Recíclate con Sogama	25
Clases sen fume	22
Mobilidade sostible e segura	21
Proxecto didáctico Antonio Fraguas	21
Vexo Veo Xacobeo	20
Galicons-net	17
Mestres gandeiros	16
O monte vivo	16
Protexe os animais	16
Paisaxe e sostibilidade	15
Escolas verdes polo clima	13
Voluntariado miúdo: Móvete!	13
Salvavidas	12
Internacionalización do centro educativo en colaboración con eTwinning	11
Nós tamén creamos!	11
Pasaporte solidario	11
Rapazas emprendedoras nas TIC	11
Naturézate	10
Fotografía en curso	8
Rede de Centros Escolares Solidarios	8
Rede de Eco Hortas Escolares	8
Xente con Don	8
Lingua, patrimonio e coñecemento tradicional	7
Educación patrimonial	5
Fitofaladoiro	5
Activistas polo mundo que queremos	4
Fondos europeos	4
Cinema en curso	2
Educación en dereitos da infancia e cidadanía global	0