• A Virxe da Humildade protagoniza a imaxe anunciadora da Semana Santa compostelá

• A presentación tivo lugar no Centro Internacional de Acollida ao Peregrino

A Xunta de Confrarías da Semana Santa de Santiago de Compostela presentou esta mañá o cartel oficial da Semana Santa 2026, nun acto celebrado no Centro Internacional de Acollida ao Peregrino, un enclave especialmente simbólico pola súa vinculación coa cidade, o Camiño de Santiago e a espiritualidade que define esta celebración.
O acto contou coa presenza do Excmo. e Rvdmo. Sr. Dr. D. Francisco José Prieto Fernández, Arcebispo de Santiago de Compostela; o Iltmo. Sr. D. Manuel Jesús Formoso Fernández, Deán da S.A.M.I. Catedral de Santiago de Compostela; e o Iltmo. Sr. D. Elisardo Temperán Villaverde, Chanceler-Secretario do Arcebispado. Así mesmo, asistiron representantes institucionais como Dna. Carmen Pita Urgoiti, Directora de Promoción da Axencia Turismo de Galicia; D. Valentín García Gómez, Secretario Xeral de Política Lingüística da Xunta de Galicia; así como diversos cargos autonómicos e municipais, responsables das Forzas e Corpos de Seguridade do Estado e representantes da Xunta de Confrarías de Santiago e das confrarías que integran a Semana Santa compostelá.
O cartel da Semana Santa 2026 está protagonizado pola imaxe da nosa Señora da Humildade, titular da Confraría da Humildade, con sede na Igrexa Parroquial de San Juan Evanxelista. Esta irmandade, fundada no ano 2008, tivo a honra de presentar e bendicir a súa imaxe titular no ano 2012 saíndo por primeira vez en procesión ao ano seguinte, tras solicitar a venia ao Arcebispado de Santiago de Compostela.
Desde o punto de vista artístico e simbólico, o cartel mostra á Virxe da Humildade emerxendo con solemnidade e recollemento dun fondo afumado de incenso. A imaxe preséntase acompañada dunha cuncha de bronce do Camiño de Santiago, emblema universal da cidade e da súa dimensión espiritual e peregrina. O fondo do cartel reproduce o baldosado característico das rúas de Santiago de Compostela, polo que os pasos procesionais percorrerán a cidade durante a Semana Santa, establecendo un vínculo directo entre a imaxe devocional e o espazo urbano que a acolle.
A composición conxuga tradición, identidade e espiritualidade, reflectindo o carácter singular da Semana Santa compostelá, declarada Festa de Interese Turístico, e subliñando a súa estreita relación coa historia, a fe e o patrimonio cultural da cidade.
A Semana Santa de Santiago de Compostela 2026 celebrarase do 27 de marzo ao 5 de abril, e volverá converter a cidade nun referente de relixiosidade popular, cultura e atracción turística, ofrecendo a composteláns, visitantes e peregrinos un programa de actos e procesións que axuntará recollemento, solemnidade e beleza artística. A programación da Semana Santa de Santiago pecharase, como cada ano, co tradicional traslado do Cristo da Paciencia á súa parroquia en Conxo o día 12 de abril.