Poderán participar grupos de ata 30 integrantes, incluíndo a dous docentes, de clases de 5º ou 6º de primaria dos colexios públicos

O 12 de xaneiro ábrese o prazo de inscricións para os centros educativos que queiran optar a participar no V Intercambio Escolar Eixo Atlántico 2025-26, que nesta ocasión levará a cabo coa cidade de Guimaraes, no norte de Portugal.

Os colexios interesados deberán presentar, antes do día 31 deste mes, unha memoria con actividades propostas para facer na Coruña cando chegue aquí o alumnado escollido. Á súa vez, a clase coruñesa elixida pasará tres días (entre abril e maio deste ano) con todos os gastos pagos na poboación portuguesa para coñecer a súa cultura e o seu patrimonio.

A memoria debe ser remitida á dirección de correo electrónico educacion@coruna.gal Terá unha extensión máxima de 20 páxinas con letra arial 11 e interlineado simple, e poderá ir acompañada de documentos gráficos explicativos. Tamén irá acompañada por unha folla inicial que incluirá: o nome e obxecto do proxecto, nome do centro educativo, nome do grupo ao que pertence o traballo (5º A, 6º C…), e o profesado responsable do mesmo.

Os proxectos deben incluír aspectos que promovan o coñecemento da cidade da Coruña e do grupo escolar coruñés ao grupo escolar portugués visitante e, especialmente, actividades na cidade e no centro educativo. Con este programa búscase facilitar o intercambio entre escolares dos diferentes municipios de Galicia e Norte de Portugal integrantes do Eixo Atlántico. Cada ano, efectúase un sorteo no que a cada poboación do Eixo tócalle outra, coa que efectúa o intercambio. O grupo escolar seleccionado deberá estar integrado, como máximo, por 30 participantes, contado a dous docentes (é dicir, un tope de 28 alumnos) de 5º ou 6º de primaria dalgún colexio público da Coruña.
“Iniciativas como esta son primordiais, para transmitir a veciñanza e proximidade cultural ás persoas máis novas, mais tamén forman parte das apostas educativas do Goberno de Inés Rey”, apuntou o concelleiro de Educación, Formación e Innovación Tecnolóxica, Juan Ignacio Borrego.