 O periplo polas parroquias farase no Bus Real que, como novidade, este ano será un autocar histórico dos anos 50

Antes de deixar os agasallos nos fogares, Melchor, Gaspar e Baltasar visitarán Ribeira por partida dobre no 5 de xaneiro. Na presentación participaron a alcaldesa, María Sampedro, e a concelleira de Cultura, Ana Barreiro. A rexedora destacou a “importancia desta cita nestas datas; un momento que agardan con moitísima ilusión os máis pequenos, pero tamén estamos expectantes os adultos. Ninguén queda exento do influxo desta máxica xornada. E, por iso, a Concellería de Cultura destina máis de 60.000 euros nun dos eventos máis significativos a nivel cultural e festivo en Ribeira. En total, repartiranse dúas toneladas de caramelos sen glute, máis dun milleiro de agasallos reais que consisten en bolas con sorpresa e once obsequios baixo o formato de sorteo. Ademais, arredor de 200 persoas implicaranse para que a estadía das Súas Maxestades os Reis Magos do Oriente transcorra perfectamente e, na cabalgata pola cidade, incorporamos a zona das Abesadas.”

Pola mañá e primeiras horas da tarde, os Reis Magos estarán nas parroquias retomando o Bus Real que, como novidade, este ano será nun autocar histórico dos anos 50. Empezarán o seu periplo pola Capela da Guía, en Carreira, (ás 10.00 horas), para seguir pola Aula de Música de Aguiño (ás 10.40 horas); porto de Castiñeiras (ás 11.20 horas); porto de Palmeira (ás 12.00 horas); centro social de Oleiros (ás 12.50 horas); Hospital da Barbanza (ás 13.30 horas); centro recreativo de Artes (ás 16.00 horas); rúa das Delicias de Corrubedo (ás 16.40 horas); e casa da cultura de Olveira (ás 17.20 horas).

Durante esta visita sortearanse oito obsequios (un por parroquia) e repartiranse caramelos e agasallos reais.
A súa maxia tamén posibilitará que ás 17.00 horas fagan unha recepción a nenos e nenas neurodiverxentes no Náutico.
E, ás 18.00 horas, as Súas Maxestades os Reis Magos do Oriente chegarán nas dornas ao porto de Ribeira, da man da Real e Ilustre Cofradía da Dorna, para saír dende a rúa de Canarias e percorrer o centro da cidade na tradicional cabalgata que será inclusiva en colaboración coa Asociación Galega para o Acompañamento Persoal e Educativo (Ágape). Ao final, pronunciarán o seu discurso e recibirán á rapazada dende a praza do Concello.

A comitiva estará conformada por un total de seis carrozas (unha por cada Rei Mago, a Estrela de Belén, o Carteiro Real e unha de temática mariñeira) e o acompañamento de Gaitas Os Castros de Ames, Culturactiva Cisnes Boneca Lareta, Charanga Gárgolas, Banda de Música de Ferrol, Troula Animación e Charanga BB+.

A maiores, a Asociación Alfaia instalará o Belén vivinte na praza do Concello. Alí, renderán tributo ao Neno Xesús.

Ademais da presencia de Policía local e GAEM durante o transcurso da cabalgata, haberá voluntarios de ICE Renovación cubrindo os laterais das carrozas para a seguridade do desfile. O Concello tamén contratará a unha vintena de monitores de tempo libre para as tarefas de organización.

Percorrido polo centro da cidade

Os Reis Magos chegarán nas dornas ao porto de Ribeira, onde serán recibidos pola alcaldesa e demais autoridades. Irán a pé ata a rúa de Canarias, dende onde arrancarán as carrozas con dirección a Padín. Haberá un tramo inclusivo sen ruído, música e con baixa luz dende o paso de peóns da rúa da Barreira ata o paso de peóns de Padín, na rúa de Galicia.

Despois pasarán por García Bayón, Concordia, Malecón, Romero Ortiz e continuarán pola rúa de Galicia ata Canarias, onde collerán cara a Miguel Rodríguez Bautista ata Centenario. Deseguido, rumbo por Constitución para pasar por Abesadas, despois Estatuto (por diante do parque e rotonda do Sereo), proseguir por Rosalía de Castro e baixar na praza do Concello para ser recibidos novamente polos representantes municipais e render tributo ao Neno Xesús no portal de Belén. Pronunciarán o discurso dende o escenario e farán o sorteo dos tres súper obsequios entre as rifas que repartiu o Carteiro Real nas parroquias e no Recuncho do Nadal durante estas datas, así como fixo Papá Noel e o Apalpador. O máxico evento finalizará coa recepción á rapazada no propio escenario e entrega dun agasallo real.