 Un festival, a visita dos Reis Magos e unha feira solidaria de libros integran as propostas

A Asociación Amas de Casa de Ribeira organiza varias actividades para o Nadal, en colaboración coa Concellería de Cultura. O folclore galego protagonizará a xornada do sábado, 27 de decembro, co festival de Nadal que terá lugar no novo Auditorio municipal, a partir das 19.00 horas. Alí haberá actuacións de pandeiretas, canto tradicional galego e baile social que chegan da man de As Silvalveiras de Corrubedo, As Garridiñas de Castiñeiras e Taller Alecrín. A entrada é gratuíta ata completar aforo e a apertura de portas será as 18.45 horas.
“En Ribeira temos un forte tecido asociativo que contribúe a dinamizar a vida social e cultural. Un perfecto exemplo disto é a Asociación Amas de Casa que goza de gran vitalidade non só na oferta de alternativas de ocio para os nosos maiores, senón tamén de propostas coas que desfrutar toda cidadanía como é este festival que se enmarca na programación do Nadal Cultural. Dende a Concellería de Cultura seguiremos camiñando da man das nosas asociacións coa finalizade de establecer e nutrir sinerxías que beneficien ao conxunto da sociedade ribeirense. Unha evidencia é a parte importante que teñen os actos do tecido social na axenda deseñada para desfrutar desta época máxica do ano. E os festivais xa celebrados foron todo un éxito que seguro se dará tamén nos que están por vir”, en palabras da concelleira de Cultura, Ana Barreiro.

Doutra banda, Puri Cores referiuse ao “compromiso cos veciños de Ribeira” por parte da entidade que preside, desenvolvendo numerosas actividades durante todo o ano.

Seguindo o espírito da solidariedade destas datas, o Club de Lectura da entidade organiza unha feira de libros usados a beneficio da Asociación de Cáncer Infantil y Juvenil de Galicia (Asanog). Será nos días 22 e 29 de decembro, en horario de 17.00 a 20.00 horas, na praza do Concello. O obxectivo é “darlle unha segunda vida a libros usados a favor de Asanog”, como manifestou a vicepresidenta, Juana Ermitas.

A maiores, os Reis Magos farán unha parada no local de Amas de Casa no domingo, 4 de xaneiro, de 18.00 a 20.00 horas. Deste xeito, Melchor, Gaspar e Baltasar saudarán e repartirán doces entre a rapazada da entidade.