— Marisol Díaz subliña que a competencia para manter limpas as zonas que rodean as cidades e áreas urbanas é municipal e insta aos concellos a implicarse na xestión da biomasa e da maleza nestes puntos para afastar a estes animais das zonas poboadas

— A responsable autonómica propón bonificar as taxas a aqueles Tecores que realicen capturas por riba do cupo establecido en cada plan anual e estudará a posibilidade de empregar outras modalidades cinexéticas alternativas, como a caza con arco

— Lanza unha mensaxe de tranquilidade ante a aparición de casos illados de peste porcina e agradece a implicación dos cazadores para apoiar accións neste eido

— A conselleira do Medio Rural celebrou unha nova reunión co sector porcino, dentro do compromiso da Xunta de ter aberta unha canle permanente de contacto para avaliar a situación e reforzar a cooperación nas medidas de bioseguridade nas explotacións

O grupo de traballo para a xestión do xabaril en Galicia avalou hoxe as propostas trasladadas por parte da Xunta co fin de reforzar e mellorar a eficacia das medidas para o control das poboacións desta especie na Comunidade a raíz da recente aparición de casos de Peste Porcina Africana (PPA) en Cataluña e como complemento ás accións que actualmente xa están en marcha.
A directora xeral de Patrimonio Natural, Marisol Díaz, presidiu esta mañá a reunión deste órgano interdisciplinar, constituído hai anos para coordinar e propoñer accións conxuntas para a xestión da especie en Galicia e integrado por representantes das administracións titulares de estradas na Comunidade (Ministerio de Transportes e Mobilidade Sostible e Axencia Galega de Infraestruturas); da Garda Civil de Tráfico e de Seprona; da Unidade de Policía Adscrita de Galicia; das Consellerías do Medio Rural e de Sanidade; da Fegamp; da Federación Galega de Caza; das sociedades de caza; e dos sindicatos e organizacións agrarias (Unións Agrarias, Asaga e Sindicato Labrego Galego).
En concreto, a responsable autonómica amosouse disposta a estudar algunhas modalidades de caza alternativas que se propuxeron na reunión (por exemplo, o recurso a arqueiros), e defendeu tamén a posibilidade de incentivar con bonificacións, mediante a exención de taxas e outras medidas, a aqueles Tecores que acrediten estar cumprindo integramente co cupo de capturas asignado a través do correspondente plan anual.
En todo caso, e en resposta á inquedanza compartida por varios dos asistentes sobre a situación xerada polas incursións de xabarís en estradas galegas e o aumento da presenza deste animais en zonas urbanas e periurbanas de Galicia, Díaz aproveitou a reunión para incidir tamén en que a competencia para manter limpos os espazos, infraestruturas e fincas que rodean as cidades é municipal.
Neste sentido, instou á Fegamp a recordarlle ás entidades locais as súas obrigas neste eido e a necesidade de implicarse activamente na xestión da biomasa e da maleza que se adoita acumular nestes puntos para afastar aos xabarís das zonas poboadas e evitar así que atopen neles alimento e lugares idóneos para o encame.
Conferencia Sectorial
Así mesmo, Marisol Díaz aproveitou a asistencia á reunión de representantes do sector agrario para insistir na necesidade de abordar a actual situación desde a tranquilidade, incidindo en que a aparición da PPA en España se circunscribe polo momento a Cataluña, onde as autoridades dan a enfermidade por controlada.
En todo caso, reiterou que, tratándose dun problema nacional, as accións a implementar e o esforzo económico correspondente non poden proceder só das comunidades. Así, cómpre lembrar que o Executivo galego xa solicitou a convocatoria inmediata dunha Conferencia Sectorial específica e conxunta (con participación dos ministerios de Agricultura, Pesca e Alimentación e para a Transición Ecolóxica e o Reto Demográfico) para coordinar a nivel nacional as actuacións en relación coa PPA, co obxectivo final de que sexan homoxéneas naquelas cuestións que afectan a todo o país.
Así mesmo, reclámase un esforzo especial ao ministro Planas á hora de buscar acordos de rexionalización nas exportacións, co fin de minimizar o impacto da doenza, localizada na provincia de Barcelona, na comercialización exterior dos produtos porcinos.
Nesta mesma liña, os traballos de xestión do xabaril han de levarse a cabo en continuo, como ven facendo a Xunta desde hai anos. Así o demostran as medidas de control adoptadas ata o momento, como a declaración da emerxencia cinexética —en vigor ata o 22 de febreiro—, ou a autorización da súa captura durante case todo o ano mediante distintas fórmulas adicionais ao período ordinario de caza, e tamén as novas medidas avaliadas hoxe polo grupo de traballo para a xestión do xabaril.
Reforzo da colaboración co sector porcino
Pola súa banda, a conselleira do Medio Rural, María José Gómez, acompañada polo director xeral de Gandaría, Agricultura e Industrias Agroalimentarias, José Baleiros, mantivo esta mañá unha nova reunión de traballo con responsables da Federación Galega de Porcino (Fegapor), para escoitar as súas demandas e preocupacións e afondar na colaboración diante dos focos localizados en Cataluña de PPA.
O encontro súmase ao mantido o pasado luns, día 1 de decembro, entre representantes do sector e técnicos da Consellería, por este mesmo motivo, así como á reunión celebrada coas organizacións profesionais agrarias o mércores día 3.

Estas xuntanzas veñen plasmar o compromiso da Xunta de manter aberta unha canle permanente de contacto co sector para avaliar a situación e a evolución dos acontecementos, así como para reforzar a cooperación en medidas clave, como as relacionadas coa bioseguridade nas explotacións porcinas, co fin de evitar posibles contaxios con fauna salvaxe.