A concelleira visitou a feira no mercado municipal de San Agustín, na que se repartirán 8.000 euros en premios

A concelleira de Emprego, Comercio e Mercados, Diana Cabanas, visitou este sábado o II Encontro de Emprendemento, que se celebra durante toda a xornada no mercado de San Agustín. Esta iniciativa do Concello inclúe charlas inspiradoras, exposicións, networking e mesas redondas.
“Desde o Concello queremos premiar a creatividade e a iniciativa dos coruñeses e coruñesas que emprenden un negocio, apostando polos seus proxectos e dándolle visibilidade a través de iniciativas coma esta”, indicou a concelleira, que lembrou que a alcaldesa, Inés Rey, estableceu como prioridade desde o 2019 a implantación de políticas de respaldo ao emprendemento.

Neste sentido, o evento de hoxe está precisamente dirixido a entidades que traballan no ámbito do emprendemento e a proxectos empresariais que teñan iniciado a súa actividade a partir do 1 de xaneiro de 2023, sempre que desenvolvan a súa actividade no termo municipal da Coruña.

O encontro ofrece este sábado un espazo de exposición e interrelación entre emprendedores, entidades e o Concello, promovendo a cultura emprendedora, o intercambio de experiencias e a posta en valor dos recursos locais. Ademais, os proxectos participantes poden optar a catro premios económicos: premio ao proxecto máis innovador de 3.000 euros, premio ao mellor proxecto de economía social de 3.000 euros e dous premios ao proxecto con maior impacto local de 1.000 euros cada un.

A selección dos proxectos gañadores será realizada durante a xornada de hoxe por unha comisión de valoración composta por persoal técnico municipal e representantes das entidades participantes. Os criterios de valoración inclúen a madurez da idea, a innovación, a viabilidade técnica e económica, a experiencia do equipo e o impacto territorial. Con esta iniciativa, o Concello da Coruña reafirma o seu compromiso co emprendemento como motor de desenvolvemento económico e social da cidade.