O conselleiro Román Rodríguez participa na UDC na conmemoración do nacemento desta Escola que formou a arquitectos que hoxe son referentes internacionais

A Xunta de Galicia felicita á Escola Técnica Superior de Arquitectura da Coruña polos seus 50 anos de traxectoria como exemplo de formación universitaria de calidade neste eido. Así o salientou o conselleiro de Educación, Ciencia, Universidades e FP, Román Rodríguez, que hoxe participou nos actos conmemorativos do nacemento deste centro, que inclúe unha exposición cun percorrido pola traxectoria da Escola desde que botou a andar no ano 1975.
O titular de Educación do Goberno galego destacou que esta Escola da Universidade da Coruña é hoxe “un referente da educación universitaria pública galega e un motor de innovación e cultura arquitectónica”. Non en balde, ao longo das últimas cinco décadas, nas súas aulas formáronse xeracións de arquitectos como Manuel Gallego Jorreto, Juan Creso, Jesús Irisarri, Guadalupe Piñera ou Patricia Sabín, entre outros, que hoxe “son protagonistas da arquitectura galega, española e internacional”.
Román Rodríguez subliñou a importancia da educación pública “como garante de igualdade de oportunidades” e, neste sentido, sinalou que esta Escola “é un exemplo de como a universidade pública galega pode formar profesionais de excelencia, impulsar a investigación e contribuír ao desenvolvemento cultural e económico da nosa terra”. Neste senso, o conselleiro reiterou o apoio e o compromiso da Xunta de Galicia coa universidade pública, que se reflicte nun financiamento estrutural estable e na aposta polo reforzo da oferta, con grados e másteres innovadores, e pola internacionalización.