O futbolista estivo acompañado en María Pita pola alcaldesa, Inés Rey, e polos nenos e nenas gañadores do concurso de postais

José Roberto Gama de Oliveira, Bebeto, premeu esta tarde o botón que acendeu as luces de Nadal na cidade, nun acto celebrado na praza de María Pita, onde tamén abriu ao público o Mercado de Nadal. A alcaldesa, Inés Rey, acompañou ao ex futbolista do Deportivo durante o evento, no que tamén participaron o gañador e os finalistas do Concurso de Postais de Nadal do Concello.

A cidade conta desde hoxe con case 3 millóns de puntos de luz led e medio milleiro de arcos luminosos espallados polos dez distritos da cidade. O alumeado de Nadal supón un investimento municipal de 770.000 euros anuais. Entre as figuras máis chamativas do Nadal coruñés están, unha vez máis, a esfera luminosa da dársena da Marina e tamén a árbore xigante de luces que habitualmente se situaba no Obelisco. Este ano, por mor das obras de reurbanización dos Cantóns, o abeto de Nadal está emprazado no Parrote.

Ademais, neste Nadal que vólvese a contar cos clásicos teitos de luz na rúa Real e a praza de Azcárraga, tamén hai decoración especial nunha das principais portas de acceso á cidade: Alfonso Molina. A bordo do ‘Atalaya’, o barco que dá a benvida aos recén chegados pola avenida, instaláronse motivos luminosos cos tres Reis Magos. En sintonía con este achegamento aos principais símbolos da Coruña, tamén hai detalles especiais sobre a fonte de Catro Camiños, onde hai iluminación en forma de paraugas con luces brancas e azuis, un guiño xa tradicional ás históricas celebracións dos éxitos do Real Club Deportivo neste punto da cidade.

Nesta edición do Nadal da Coruña, o Concello instalou case 560 arcos luminosos nas rúas da cidade. A meirande parte deles, ao longo dos percorridos máis transitados e poboados de cada barrio. Aos arcos súmanse centos de motivos navideños e detalles luminosos máis pequenos, que se habilitarán nos báculos de alumeado público.

Máis de 300 eventos ata o 5 de xaneiro

A programación cultural e de ocio do Nadal na Coruña conta este ano con case 300 eventos ata o 5 de xaneiro. Inclúe, como cada ano, concertos, obras de teatro, festivais, visitas guiadas ás casas museo e salas de exposicións, actividades infantís, galas de Nadal…

Aproveitando a celebración do mercado en María Pita, as actuacións das corais e as panxoliñas regresarán á praza, onde tamén haberá representacións teatrais e un concerto de Cántigas da Terra. Os centros cívicos e as asociacións veciñais volverán a acoller festas e talleres de Nadal, así como as visitas de Papá Noel e os Reis Magos.

Tamén haberá máxima actividade nos espazos culturais de referencia da cidade, como o Coliseum, o Teatro Colón ou o Rosalía, sen esquecernos do Ágora ou o Fórum, con programación para todas as idades. Toda a programación poderá consultarse na páxina web municipal e nas redes sociais do Concello.