A cita gastronómica terá lugar o 6 de decembro e os establecementos ofrecerán o peixe de balde e con variedade de receitas

OPP83 celebrou este venres o acto de presentación oficial do cartel da IV RUTA CO LIRIO, ruta de tapas organizada pola Cooperativa Santa Eugenia de Ribeira, en colaboración coa Asociación de Hostalería de Ribeira e a Asociación de Empresarios da Pobra. O acto reuniu no Auditorio de Ribeira a representantes municipais, líderes das asociacións e hostaleiros participantes, consolidando unha iniciativa que se erixe como referente gastronómico da comarca do e que cada ano supera o nivel de participación.

A Organización de Produtores Pesqueiros ribeirense anunciou que o sábado 6 de decembro ata fin de existencias se ofrecerán tapas gratuítas elaboradas con Lirio de Ribeira en 28 bares e restaurantes de Ribeira e A Pobra do Caramiñal. A IV RUTA CO LIRIO aumenta este ano o número de participantes, xa que na pasada edición chegáronse aos 25 establecementos; en 2023, 10; e, no 2022, 17.

Durante a presentación, a xerente da OPP83, María José Casais, sinalou que “o corazón desta actuación é apoiar á hostalería, auténtica embaixadora dos produtos autóctonos, e poñer en valor o Lirio de Ribeira, que representa o traballo, a responsabilidade e a identidade da nosa frota”. Cada ano superamos o número de participantes, e nesta edición contaremos con 28 bares e restaurantes de Ribeira e da Pobra, que ofrecerán tapas gratuítas aos veciños e visitantes”, e engadiu:
“Estamos moi orgullosos de ver como cada ano medra a participación e a creatividade da hostalería local, facendo auténticas delicias con un Lirio de Ribeira dunha calidade extraordinaria”.

A alcaldesa de Ribeira, María Sampedro, celebrou a continuidade desta ruta gastronómica impulsada pola OPP83, que “nos deixará con moi bo sabor de boca”.
A primeira edil destacou o papel da IV RUTA CO LIRIO como motor para dinamizar a economía local, poñer en valor os produtos pesqueiros ribeirenses e defender a gastronomía da comarca. “O lirio é unha das especies máis común nas nosas mesas como localidade costeira que somos, pero é o momento de que tamén teña o recoñecemento e lugar que merece”, declarou ante os medios, para a continuación agradecer a labor de promoción da Cooperativa Gallega del Mar Santa Eugenia de Ribeira. A mandataria municipal rematou convidando a todo o mundo a participar o 6 de decembro na ruta e reforzando a importancia da unión entre concellos veciños: “Cando somos capaces de unir esas sinerxias, iso ao final tamén é sinónimo de cogobernanza e unión”.

Como representante do Concello da Pobra do Caramiñal, Estefanía Ramos declarou que a RUTA CO LIRIO é unha acción que axuda a poñer un valor un produto de calidade como o Lirio de Ribeira e tamén é útil para reforzar o traballo conxunto entre concellos, hostalería, sector pesqueiro e tecido empresarial: “Cando colaboramos, gañamos todos. Gañan os profesionais do mar, os negocios locais e, sobre todo, gaña a veciñanza e a xente que nos visita”. Para rematar, a concelleira de Turismo da Pobra quixo animar aos hostaleiros locais a sumarse a esta ruta na próxima edición e pediulles que “aposten unha vez máis por dinamizar o noso municipio”, xa que “iniciativas como esta teñen un impacto moi positivo”.

Antonio Lijó, vicepresidente da Asociación de Hostalería de Ribeira, asegurou que actuacións como a RUTA CO LIRIO “son fundamentais para a vida dun pobo, para a hostalería e para o mar”. Nesta liña, destacou que o lirio, “unha especie humilde, pero esencial”, “move emprego e leva o nome de Ribeira por toda Europa”. E engadiu a necesidade de traballar xuntos e asociarse: “Unidos, mariñeiros, empresas, hostalería… podemos facer do lirio non so un produto senón un símbolo de identidade, calidade e futuro para Ribeira”. Pola súa parte, o presidente da Asociación de Empresarios da Pobra, José Antonio Vidal, mostrou o seu entusiasmo coa participación da súa localidade nesta nova edición: “É o segundo ano que participamos e teño que dicir que os hostaleiros e hostaleiras da Pobra están encantados de participar”. Nesta liña, celebrou que este tipo de accións serven para reforzar “a unión entre concellos veciños” e converten o Lirio de Ribeira “nun auténtico emblema de calidade, innovación e orgullo da nosa terra”.

Ao acto tamén acudiron o presidente da OPP83, Juan Antonio Pérez, o membro do Consello Reitor da OPP83, Pablo Pérez, e o concelleiro do Mar, Fernando Abraldes.

Listado de bares e restaurantes participantes

Na presentación, a OPP83 tamén recoñeceu o esforzó dos propios negocios participantes, que cada ano fan receitas innovadoras e saborosas co Lirio de Ribeira facendo así a mellor promoción posible deste produto pesqueiro. En Ribeira participan nesta IV RUTA CO LIRIO: A Recoveira, Brétema, Café Plaza, Cocoluche, Tagen Ata, Tapería A de Maris, Bar Zum Zum, Bulebar, Tío Pepe, Pizzería D’Vicio, El Gourmet Alján, Bar Porrón 2.0, A Central, Bar Pequeño, A Reviravolta, O Bodegón, Bar Bahía, Penín Gastrocervecería e A Chabola, mentres que na Pobra do Caramiñal se suman Bar Alameda, Bar La Calle, Bar Miramar, Mi Manda Picone, A de Rosa, Bar Galeón, Restaurante Sisal, Café 420 e Bar Curotiña.

A IV RUTA CO LIRIO forma parte das actividades promocionais realizadas pola OPP83 dentro do seu Plan de Produción e Comercialización, que conta coa cofinanciación da Xunta de Galicia e do FEMPA. Con estas actuacións, a Cooperativa Santa Eugenia de Ribeira pretende incrementar o consumo de peixe entre a poboación e poñer en valor o Lirio de Ribeira, marca colectiva da OPP83.