A concelleira Nereida Canosa e Ricardo Iglesias, xerente de ASPACE Coruña, presentaron no Salón Real de María Pita a nova edición desta iniciativa, que cumpre dez anos

O acto central celebrarase o mércores 3 de decembro, ás 11.30 horas, na explanada do Parrote, coa participación de máis de 100 entidades sociais de toda Galicia baixo o lema #Xente10

A concelleira de Benestar Social, Participación e Igualdade, Nereida Canosa, presentou esta mañá no Salón Real do Palacio Municipal a décima edición de ‘Baixo o Mesmo Paraugas’, iniciativa coa que a cidade da Coruña se suma, un ano máis, á conmemoración do Día Internacional das Persoas con Discapacidade.

Na rolda de prensa estivo acompañada por Ricardo Iglesias, xerente de ASPACE Coruña, en representación das entidades impulsoras da campaña.

Canosa lembrou que o Concello da Coruña apoia esta iniciativa dende o ano 2016, cando botou a andar por impulso de ASPACE Coruña xunto con outras entidades da cidade, e que ao longo desta década ‘Baixo o Mesmo Paraugas’ medrou ata integrar máis de cen entidades sociais de toda Galicia, converténdose nun símbolo de unidade e defensa dos dereitos das persoas con discapacidade. Canosa rercordou que desde á chegada de Inés Rey á alcaldía o Concello incrementou a súa aportación económica ao terceiro sector para impulsar tamén o traballo das entidades vinculadas coa axuda á discapacidade.

Nesta edición, que celebra o seu décimo aniversario, a campaña adopta o lema #Xente10, co que se rende homenaxe ás persoas con discapacidade, ás súas familias, ás profesionais, ao voluntariado e ás entidades que sosteñen o proxecto ano tras ano. A concelleira subliñou que o apoio municipal concrétase “sobre todo, no compromiso de avanzar cara a unha cidade accesible e con igualdade real de oportunidades”.

O acto central terá lugar o mércores 3 de decembro, ás 11.30 horas, na explanada do Parrote, onde se dará lectura a un manifesto conxunto e a veciñanza será convidada a alzar os seus paraugas de cores como xesto de apoio á inclusión. A continuación, está prevista unha marcha polas rúas do centro da cidade, convertendo o espazo urbano nun escenario compartido de celebración da diversidade e de reivindicación dos dereitos das persoas con discapacidade.

Na presentación desta mañá participaron tamén representantes das entidades de discapacidade, que puxeron en valor o traballo en rede e a visibilidade que lles achega unha acción colectiva coma esta. Canosa pechou a rolda de prensa invitando á cidadanía a sumarse á xornada: «Porque, en definitiva, baixo o mesmo paraugas cabemos todas e todos; e unha cidade que se organiza arredor das persoas con discapacidade é unha cidade máis xusta, máis humana e tamén máis feliz», indicou a concelleira.