A actuación suporía un investimento de máis de 145.000 euros, dos que se solicita que o ente provincial subvencione o 80%

O Pleno municipal de Frades aprobou por unanimidade solicitarlle unha subvención nominativa á Deputación Provincial da Coruña para executar un proxecto de mellora da seguridade viaria en Os Canedos (Mesos) e O Pazo (Abellá). Un proxecto orzamentado en 146.650 euro, dos que o Concello de Frades solicita unha achega do 80% (117.000 euros).

O alcalde de Frades, Roberto Rey, explica que “trátase de construír sendas peonís ou cunetas transitables nos accesos ás distintas igrexas e cemiterios do municipio. Este ano vimos de facer unhas en Añá, que se suman ás obras de humanización feitas hai un par de anos en Moar e Papucín, e a nosa idea e ir facendo o mesmo por todas as parroquias, sobre todo preto das Igrexas, cemiterios e locais sociais”.

Resto da sesión

O Pleno tamén aprobou por unanimidade a adhesión a un programa da Deputación da Coruña que permite a encomenda da xestión en materia de selección do persoal funcionario interino para o posto de arquitecto/a ao ente provincial. “Frades ten cuberto o posto de arquitecta pero, en previsión do que poda pasar, preferimos estar adheridos a este acordo para poder tirar desa bolsa de arquitectos no caso de que fora necesario”, sinalou Rey Martínez.

Finalmente, o Pleno aprobou unha modificación da Relación de Postos de Traballo (RPT) do Concello de Frades, acordada cos representantes dos traballadores. Entre outros cambios contempla a praza fixa da secretaria-interventora municipal, o posto de animador sociocultural pasa de media xornada a xornada completa e crea un posto de operario de servizos múltiples a tempo completo, que supón a eliminación de dous postos actuais.