· Veciños e representantes de todos os grupos políticos —excepto do BNG— volveron concentrarse hoxe para reclamar ao Ministerio de Transportes que reconsidere a decisión tomada sobre o novo proxecto do ramal de conexión entre as liñas León-A Coruña e Betanzos-Infesta-Ferrol.

O Concello de Bergondo, xunto coas veciñas e veciños afectados, volveu mostrar hoxe o seu rexeitamento firme ao proxecto do Ministerio de Transportes para o ramal de conexión entre as liñas León–A Coruña e Betanzos-Infesta–Ferrol, unha actuación que supoñería a eliminación do baipás de Infesta e que, segundo a administración local, provocaría un impacto inasumible na parroquia de Cortiñán.

A manifestación celebrada esta tarde reuniu a veciños e veciñas das zonas afectadas e a representantes de todos os grupos municipais excepto o BNG. Durante a protesta, as persoas participantes cortaron outra vez, de maneira puntual, a estrada DP-0105 tras unha pancarta co lema “Por unha alternativa xusta. Cortiñán non mutílase”, visibilizando así a súa oposición ao trazado proposto polo Goberno central.

Ao longo do acto, quedou patente unha vez máis a unidade do Concello e da cidadanía na defensa dunha solución máis sensata, máis económica e máis respectuosa co territorio. O Concello non se opón á mellora das comunicacións ferroviarias, pero insistiu en que o proxecto actual non achega ningún beneficio real nin para Cortiñán nin para Bergondo. Sinala que todo se reduce a un suposto aforro de seis minutos, mentres segue sen abordarse de maneira seria cal debe ser o futuro do transporte cara a Ferrol.

O Concello volve lembrar que xa presentou un recurso formal #ante o Ministerio tras o rexeitamento estatal á proposta municipal coñecida como Alternativa 5S, deseñada para afastar o trazado das vivendas, reducir as expropiacións e minimizar o impacto social e urbanístico. A administración local insiste en que a alternativa estatal, a denominada Alternativa 6, deixa a numerosas vivendas atrapadas na zona de servidume ferroviaria, devalúa propiedades e limita gravemente o desenvolvemento urbanístico dunha zona xa consolidada. Segundo o goberno local, esta situación non é lóxica, nin humana, nin politicamente aceptable.

A proposta defendida polo Concello, a Alternativa 5S, adapta trazados previamente estudados para simplificar a execución, diminuír notablemente a necesidade de viadutos e trasladar a intervención a zonas industriais ou forestais, evitando así afeccións directas sobre os fogares. Desde o Concello insistiuse en que esta opción representa unha solución máis sensata, máis económica e máis xusta, tanto polo seu menor custo como pola protección que ofrece ás persoas afectadas e ao territorio de Bergondo.