• As inscricións teñen un prezo de 20 euros por participante e estarán abertas ata o 2 de decembro.

• A alcaldesa, Ana María López, destaca que “desde o Concello seguimos apostando por políticas que sitúan ás familias no centro e estes campamentos son un exemplo claro do noso compromiso”.

O Concello de Cariño abre as inscricións para unha nova edición do campamento de conciliación ‘Concilia Cariño de Nadal’, unha iniciativa deseñada para ofrecer ás familias unha alternativa de lecer educativo durante as vacacións escolares e facilitar a conciliación nunhas datas especialmente complexas para a organización familiar.

O campamento celebrarase os días 22, 23, 24, 26, 29, 30 e 31 de decembro, e 2 e 5 de xaneiro no CEIP Manuel Fraga Iribarne, en horario de 9:30 a 14:30 horas. Está dirixido a nenos e nenas de entre 3 e 12 anos e conta cun máximo de 36 prazas dispoñibles.
Durante as xornadas, os participantes gozarán de actividades centradas na música e o movemento, a ciencia, dinámicas de grupo, manualidades e cociña, entre outras propostas de lecer educativo.

As inscricións estarán abertas ata o martes, 2 de decembro, ás 14:00 horas e poderán formalizarse de forma telemática a través da páxina web escuelacontalento.es/campamentos. O prezo desta edición é de 20 euros por participante, con descontos para familias que inscriban a máis dun fillo. Este ano, o campamento presenta un prezo máis accesible co obxectivo de chegar a un maior número de familias do concello. As bases completas do programa poden consultarse na páxina web municipal.

A alcaldesa, Ana María López, destaca que “desde o Concello seguimos apostando por políticas que sitúan ás familias no centro. Estes campamentos son un exemplo claro do noso compromiso coa conciliación, especialmente nunhas datas nas que a organización familiar resulta máis complexa. O noso obxectivo é ofrecer un recurso útil, accesible e de calidade ás familias do noso municipio”.