Andeiro, Altamira ou Meixigo son algunhas das zonas que sofren no día a día como os colectores de lixo se converten en pequenos vertedoiros debido a prácticas pouco cívicas.

O goberno municipal aceptou no pleno de onte a esixencia de Alternativa para que se tomen medidas para a concienciación a través de accións de prevención e información, pero tamén de incrementar a vixiancia e as sancións.

As campañas que se realizan dende o Consorcio non están a ter calado na veciñanza, motivo polo cal o grupo defende a inclusión de contidos educativos ao respecto nos diferentes centros escolares, así como incrementar a información á veciñanza a través de bandos ou carteís.

Por outra banda, dende Alternativa tamén denuncian que deberían establecer tamén medidas de reforzo de control e vixiancia, para poder sancionar as persoas que fan un mal uso do servizo de recollida de lixo.