A formación nacionalista salienta a importancia de protexer o patrimonio cabanés e denuncia a falta de rigor do documento autonómico, “que pasa por alto bens singulares e de enorme valor histórico e cultural”

“Cabanas non pode quedar fóra dun catálogo que aspira a recoller o mellor do noso patrimonio costeiro”, destaca o BNG

O pleno do Concello de Cabanas aprobou, por unanimidade, a proposta presentada polo BNG para reclamar á Xunta de Galiza a inclusión da Casa de Xan Ares e do Muíño de Maré do río Castro no novo Catálogo de bens de valor cultural do litoral, que se atopa en exposición pública até o próximo 1 de decembro.

A formación nacionalista celebrou o apoio do resto de grupos da Corporación e salientou a relevancia desta decisión para “corrixir unha evidente e sorprendente falta de rigor nun documento que identifica 1.582 bens costeiros en toda Galiza pero non inclúe dous elementos de enorme valor patrimonial situados en Cabanas”.

O portavoz do BNG, Iago Varela, explicou que o obxectivo da proposta é garantir que Cabanas figure no catálogo “con aqueles elementos que nos definen como territorio”. “A Casa de Xan Ares e o Muíño de Maré son parte da memoria histórica, cultural e arquitectónica deste concello, e non podemos permitir que o noso patrimonio desapareza do mapa pola falta de actualización ou de coñecemento por parte da Xunta”, afirmou.

Varela recordou que a Casa de Xan Ares, construída a finais do século XIX, foi escenario dun dos primeiros mítines agraristas de Galiza. Alén disto, é un edificio singular e catalogado no Plan Básico Autonómico que conserva o muro de peche sobre o que existía un embarcadoiro tradicional. Pola súa banda, o Muíño de Maré do Río Castro, unha singular construción mixta capaz de funcionar coa auga do río e das mareas, “forma parte da nosa historia industrial e etnográfica, conservando elementos estruturais de gran valor”.

A moción sometida á votación do pleno polo BNG insta ao goberno local a reclamar a presentación de alegacións á exposición pública deste catálogo, e á Xunta de Galiza a modificalo, para protexer e poñer en valor o patrimonio litoral de Cabanas.

Para o BNG, este acordo representa “o primeiro paso para garantir que o noso patrimonio non quede relegado nin esquecido”.