 A mostra pódese visitar ata o 13 de decembro

Unha escolma de 23 de obras conforman a mostra correspondente co XIX Premio Internacional Jesús Núñez de Arte Gráfica 2024 promovida pola Deputación da Coruña e que chega no seu itinerario ao Centro Cultural Lustres Rivas de Ribeira.

Durante a apertura, a concelleira de Cultura, Ana Barreiro, destacou que “Ribeira goza dun forte dinamismo cultural e, proba disto, son os eventos que tivemos coa arte, o teatro ou a literatura nas últimas semanas.”

A dita mostra atópase integrada por creacións procedentes de diferentes disciplinas técnicas escollidas polo xurado do dito certame anual. Entre as pezas exhibidas atópase a gañadora desta edición: a serigrafía A la deriva II, de José Andrés Santiago. Tamén se pode contemplar a mención de honra Nevado II, de Miriam Canera Arranz.

A gañadora está integrada por un conxunto de pequenas pezas de papel washi xaponés, serigrafiadas a man con tinta branca, onde se poden observar diferentes fragmentos do plano da cidade xaponesa de Kyoto. Estes trazos e a cor elixida outórganlle á peza moito movemento con sutileza.

Esta obra pertence á serie My Kyoto privado resultado da estadía posdoutoral do artista na Kyoto Seika University entre 2014 e 2016, que lle permitiu continuar co seu labor investigador no ámbito dos estudos de manga e anime. Esta experiencia de vagar pola urbe tivo como froito o conxunto de serigrafías.
“Convidámolos, polo tanto, a aventurarse nesta viaxe por Kyoto a través da tinta e do papel, ademais de coñecer outros artistas e a súa mirada creativa, aproveitando esta excelente oportunidade de achegarnos á estampa contemporánea”, rematou a edil.

A sala pódese visitar ata o 13 de decembro, de luns a venres, de 10.00 a 14.00 e de 18.00 a 21.00 horas, ademais dos sábados, desde as 10.00 ata as 14.00 horas.