A alcaldesa, Inés Rey, presidiu a sesión no Salón de Plenos municipal, coa colaboración de UNICEF Comité Galicia

O Concello da Coruña celebrou esta mañá unha nova edición do Pleno Infantil, unha iniciativa institucional organizada en colaboración con UNICEF, enmarcada na conmemoración do Día Internacional da Infancia, celebrado o pasado 20 de novembro.

A sesión tivo lugar no Salón de Plenos municipal e contou coa participación de 140 alumnos e alumnas de 5º e 6º de Educación Primaria de centros educativos da cidade. O acto estivo presidido pola alcaldesa, Inés Rey, quen puxo en valor o papel da infancia como parte activa da sociedade: “Neste salón tómanse decisións importantes para a cidade, e hoxe sodes vós quen tomades a palabra para tratar un tema que tamén require accións e compromisos: a violencia dixital”.

A rexedora subliñou que “esta é unha oportunidade para escoitar a infancia, pero tamén para que eles e elas vexan que a súa opinión é útil, necesaria e tida en conta”. Afirmou tamén que “educar en dereitos e participación desde a escola é esencial para construír unha cidade máis segura, máis xusta e máis democrática, tamén no mundo dixital”.

No acto participou tamén o concelleiro de Educación, Juan Ignacio Borrego, quen puxo en valor o traballo realizado polos centros educativos e destacou “a importancia de abrir espazos como este, onde a infancia poida expresarse libremente, aprender a participar e facer valer os seus dereitos desde o respecto, o diálogo e a colaboración”.

A violencia dixital foi o tema central do pleno, un dos retos que máis preocupan actualmente á infancia e ás comunidades educativas. A través do traballo previo nas aulas e da súa intervención pública no pleno, o alumnado analizou, debateu e presentou propostas sobre o uso responsable da tecnoloxía, o respecto nas redes e o dereito a un entorno dixital seguro.

O Pleno contou tamén coa presenza de Julio Gonzalo Fernández Vázquez, membro da xunta directiva de UNICEF, quen puxo en valor o papel das administracións locais na defensa dos dereitos recollidos na Convención sobre os Dereitos do Neno e da Nena, especialmente o dereito a ser escoitado e a expresarse libremente.

O Pleno contou coa participación de alumnado de seis centros educativos da cidade —CEIP Curros Enríquez, CEIP Labaca, CPR Dominicos, CPR Escolapios, CPR Salesianos e CPR Karbo— que estiveron representados por grupos que interviñeron no Salón de Plenos e deron lectura, de maneira conxunta, ao Compromiso pola Infancia Dixital na Coruña, un documento elaborado colectivamente coas achegas de todos os colexios participantes.