· A actuación conta cun orzamento de 315.538,22 euros e está financiada a través do Plan Único da Deputación da Coruña.

· O proxecto transformará as actuais pistas asfaltadas nunha rúa residencial, priorizando a seguridade peonil e o benestar da comunidade educativa.

O Concello de Bergondo levará este xoves, 27 de novembro, a pleno a aprobación do Plan Único Adicional da Deputación dá Coruña, que inclúe un proxecto para a construción dunha contorna escolar segura e saudable na zona da Escola Infantil Municipal de Guísamo

A actuación, destinada a mellorar a accesibilidade, a mobilidade peonil e a calidade do espazo público para nenas, nenos, familias e veciñanza, conta cun orzamento total de 315.538,22 euros. O obxectivo é converter as actuais pistas asfaltadas nunha rúa residencial, creando unha contorna máis segura para a comunidade educativa e para o resto de veciños e veciñas da área, así como para a parroquia e a súa igrexa.

A intervención supón a creación dunha plataforma única, cun ancho variable de entre 4 e 6 metros, que permitirá configurar a rúa en sentido único e mesmo habilitar zonas completamente peonís. Esta solución busca xerar unha contorna de tráfico acougado, onde desaparecen os carrís de circulación definidos, favorecendo cambios de comportamento e priorizando a presenza peonil.

O deseño do novo espazo inclúe unha serie de melloras integrais: un novo firme combinado con pavimento de lastra prefabricada e laxas de granito, que achegará seguridade e unha estética acorde coa zona; pavimentación e ordenación da parcela destinada a aparcamento; axardinamento da contorna; renovación da iluminación pública; soterramento das liñas telefónicas existentes; rehabilitación do lavadoiro tradicional, actualmente en mal estado, recuperando un elemento patrimonial de valor para a comunidade.

Desde o goberno local sinalan que este proxecto “responde á necesidade de crear espazos seguros ao redor dos centros educativos, reducindo o tráfico e fomentando unha mobilidade máis accesible e humana”.
Engaden que “a actuación beneficiará non só ás familias da Escola Infantil Municipal, senón tamén ao conxunto da parroquia de Guísamo”.