• Reiterarán á Xunta que manteña a rotonda da AC-523 que comunica con Rumbo e reforce a iluminación nese tramo para mellorar a seguridade

• Tamén esixen á Deputación melloras urxentes nas estradas provinciais DP-0511, DP-3109 e DP-3102

• Deficiencias na recollida de lixo e entulleiras e asentamentos ilegais evidencian o abandono da xestión municipal na parroquia

• «Ledoño paga como zona urbana, pero recibe servizos de terceira», resume Izaskun García, portavoz municipal do PP

O Partido Popular de Culleredo reuniuse con veciños de Ledoño dentro da súa campaña «Rúa a rúa, escoitando» para coñecer de primeira man os seus problemas e demandas. Os veciños denuncian o “abandono xeral” da parroquia, unha situación que o PP atribúe á inacción e falta de xestión de José Ramón Rioboo tanto como alcalde como deputado provincial, «esquecéndose» de Ledoño por partida dobre. «Falamos de servizos básicos que calquera veciño debería ter garantidos», subliña a portavoz popular, Izaskun García.
A seguridade viaria é unha das principais preocupacións trasladadas polos veciños. O PP insistirá #ante a Xunta na necesidade de manter a pequena rotonda xa existente na estrada AC-523, que comunica con Rumbo. Tamén alertará da falta de iluminación na nova rotonda que dá acceso ao colexio British, aínda en obras, e do perigo que supón de noite e con mal tempo. “Sabemos que son peticións moi razoables e así llas trasladaremos á Xunta para que dea solucións”, sinala Izaskun García.
Os populares reclaman, ademais, unha actuación inmediata da Deputación da Coruña nas estradas provinciais de Ledoño. Os veciños sinalan que a DP-0511, entre Veiga e Boedo, é unha vía demasiado estreita para o paso de camións e, por iso, o resto de vehículos ven obrigados a dar a volta. A isto súmase a falta de rozas regulares, que impide ver as cunetas, e a ausencia de iluminación pública en todo o percorrido Tamén reclaman o arranxo da DP-3109, fronte ao centro social, moi danada tras soportar o desvío de tráfico polas obras da nova rotonda, e melloras na estrada de Rumbo (DP-3102), na que piden senllas peonís e unha marquesiña para a parada do autobús escolar. «Rioboo tampouco levanta a voz na Deputación para defender a Ledoño; nin como alcalde nin como deputado está onde ten que estar», critica a portavoz do PP.

A pedimento dos veciños, os populares solicitarán o arranxo urxente da estrada que sobe desde o cemiterio, unha vía de titularidade municipal que os veciños consideran «intransitable» polas fochancas a pesar de dar servizo a varias vivendas. Tamén esixirán explicacións polo atraso na execución da senda verde de Bregua, anunciada en 2023 por Rioboo como unha actuación “inminente” e da que seguen sen ter noticias.
As deficiencias na recollida de lixos constitúen outra das grandes queixas en Ledoño. Os veciños denuncian falta de limpeza, pouca frecuencia no servizo e que os contedores son escasos e a maioría están deteriorados. Reiteran, ademais, a proliferación de entulleiras ilegais na zona de Rumbo, onde reclaman unha actuación decidida do Concello para a súa eliminación e control.
Tamén mostran a súa preocupación polos asentamentos ilegais en terreos rústicos, especialmente na contorna da Raposa e noutros puntos de Ledoño. Os veciños din sentirse «indefensos» e aseguran que viron abrir gabias para enterrar cables conectados de forma ilegal. O PP comprometeuse a visitar a zona e lembrou que calquera indicio de novas ocupacións debe trasladarse de inmediato á Garda Civil e á Axencia de Protección dá Legalidade Urbanística (APLU).
Por último, os veciños cargan contra a falta de persoal e a “pésima” atención ao cidadán no Concello, onde, segundo relatan, «vas cun problema e sales con dous». Na reunión tamén afloraron as queixas pola falta de fibra óptica en varias vivendas, que seguen sen acceso a unha conexión adecuada. «Ledoño paga como zona urbana, pero recibe servizos de terceira», resume Izaskun García, que reclama a Rioboo «menos promesas incumpridas e máis xestión efectiva para os veciños de Culleredo».