O Concello reserva un total de 16.000 euros para apoiar o labor do movemento asociativo e dos clubs deportivos

O Concello de Neda abre este mércores o prazo para solicitar as axudas municipais dirixidas entidades, asociacións, ou agrupacións veciñais da localidade para a promoción de actividades culturais e deportivas. A administración local reserva 16.000 euros para apoio o labor das entidades sen fin de lucro para o financiamento de iniciativas desenvolvidas entre o 1 de xaneiro e o 31 de decembro deste 2025.

Segundo rezan as bases da convocatoria, poderán beneficiarse entidades sen fin de lucro, inscritas no Rexistro municipal de asociacións e que desenvolvan as súas actividades “preferentemente no termo municipal” ou, no caso de efectuarse fóra, “deberán tratarse de actividades que suplan ou complementen ás atribuídas ao Concello”.

Cultura

No eido cultural, subvencionables actividades como exposicións, publicacións, celebracións, conferencias, homenaxes, concursos, certames, mostras, excursións culturais, eventos musicais, estudios e “en xeral, calquera actividade de conservación, promoción e divulgación dos valores culturais”. Primaranse as iniciativas dirixidas aos colectivo de maiores e á mocidade, así como as organizadas conxuntamente por varias asociacións.

O goberno local destinará 10.000 euros para promocionar as actividades culturais, mantendo o importe máximo a conceder por solicitude en 1.500 euros.

Deportes

No plano deportivo, apoiarase o traballo de clubs deportivos que fomente as actividades físico-deportivas ao longo do 2025. Primarase no reparto de fondos (un total de 6.000 euros) aos que  organicen actividades de carácter permanente, aos que teñan máis dun equipo en competición, e aos que conten con máis fichas en competición federadas.

Tras a publicación hoxe da convocatoria no Boletín Oficial da Provincia, ábrese o prazo para pedir as axudas ata o vindeiro 9 de decembro. Terase que presentar a solicitude, acompañada da pertinente documentación, no rexistro xeral municipal.