O encontro tivo lugar no Café Riazor, no barrio de Chelsea, un local fundado en 1974 e que ten a praia herculina como símbolo

A alcaldesa, Inés Rey, mantivo este sábado un encontro con coruñeses e coruñesas que desenvolven a súa carreira profesional en Nova York. O encontro, que serviu para reforzar a conexión entre A Coruña e o exterior, tivo lugar nun espazo simbólico que representa a pegada cultural da cidade en Nova York.

O histórico Café Riazor, un espazo simbólico para os coruñeses en Nova York fundado en 1974 coa praia herculina como símbolo, leva cincuenta anos mantendo viva a cultura e a identidade da cidade galega no barrio de Chelsea. “Este local é a proba de que A Coruña non entende de distancias”, concluíu Rey.

Participaron no encontro perfís destacados do ámbito científico, tecnolóxico, xornalístico, académico e da xestión cultural. Ao longo da reunión abordáronse cuestións relacionadas co futuro da Coruña, coa innovación, coa ciencia e co papel que estes perfís poden ter como aliados na proxección internacional da cidade.

A alcaldesa subliñou o orgullo que supón para a cidade contar con coruñeses e coruñesas liderando proxectos de referencia internacional: “A Coruña ten moitísimo talento e hoxe ese talento tamén se proxecta desde Nova York”. Tamén destacou o papel das mulleres científicas presentes, ás que cualificou como un exemplo de excelencia: “É unha honra contar con investigadoras que están a facer avanzar a neuroloxía, a xenética ou o tratamento do cancro. Son un orgullo para a Coruña e unha inspiración para as novas xeracións, especialmente para as nenas que soñan con dedicarse á ciencia”.

Ciencia, arquitectura e cultura neoyorquina con selo coruñés

No encontro, ao que tamén acudiu o presidente da Autoridade Portuaria, Martín Fernández Prado, participaron profesionais coruñeses e coruñesas cunha traxectoria destacada en ámbitos clave para o desenvolvemento científico, tecnolóxico, cultural e económico da cidade. Fernández Prado salientou “que foi un auténtico pracer comprobar o interese e o apoio dos profesionais coruñeses en Nova York a Coruña Marítima, unha iniciativa sólida e necesaria que pode proxectar a cidade cara novas oportunidades de desenvolvemento e prestixio”.

No caso das mulleres científicas, participaron no encontro diferentes profesionais en materia sanitaria e tecnolóxica: Susana Martínez-Conde, profesora na Universidade Estatal de Nova York e especialista en oftalmoloxía e neuroloxía; Juana Fernández, enxeñeira en Microsoft e recoñecida entre as 100 mulleres máis influentes de Galicia; Sandra Barral, investigadora en xenética e Alzheimer na Universidade de Columbia; e Vera García Outeiral, posdoutoral en Columbia especializada en terapias para carcinoma hepatocelular.

Así mesmo, tamén participou Álex Maroño Porto, xornalista e Editor Asociado en The Atlantic, xunto con Sergio Pardo López, arquitecto no Departamento de Asuntos Culturais da Cidade de Nova York.