A gran cuberta que coroará o gran edificio público de Bastiagueiro foi izándose moi lentamente no día de hoxe nunha espectacular operación dunhas 8 horas cun guindastre de alta potencia como gran protagonista da xornada, pois foi quen de trasladar ás alturas unha estrutura de 750 toneladas. O proceso continúa anclando a estrutura de 41,5 metros de diámetro á xa construída, que conforma, a base de grandes planos de formigón, o sistema de paredes e vidros que lle aportan ao edificio a súa característica forma de zigurat redondeado que desde o principio, segundo dixo o arquitecto, Fernando Martínez, buscou ter a maior integración paisaxística visual pese ás súas dimensións.

“Ten esa forma de pirámide que vai decrecendo coa altura para que deixe ver o bosque posterior; é un polígono con forma circular coa idea democrática que todo o mundo poida estar á mesma distancia do foco”. Son palabras do arquitecto, que resaltou o carácter verde do edificio, xa que desde dentro, cando o espectáculo o permita, poderase divisar o fondo vexetal da contorna, o que o convirte nun edificio moi especial, xa que este tipo de recintos solen ser pechados ao exterior.
“Unha obra moi singular”, en palabras do alcalde de Oleiros, Ángel García Seoane. Un edificio que non só será para espectáculos culturais, senón tamén para competicións deportivas, congresos e reunións de todo tipo, porque dispón de todas estas instalacións na planta baixa que o fan moi versátil.

Fixo tamén alusión ás gradas fixas e ás retráctiles, pero tamén aos boicots que sufriu a obra: “Este edificio íase construír hai máis de 20 anos, pero naquel momento o PSOE de Oleiros boicoteara a obra cando xa estaba en fase de concurso, polo que ademais de non poder iniciar a construción, houbo que indemnizar á empresa contratada”. “Un edificio que se chamará a colmea porque dentro traballa todo o mundo, cada persoa co seu cometido”, dixo o alcalde.

A plataforma que hoxe alzaron en Bastiagueiro ocupa unha superficie de 1.450 metros cadrados e mide 135 metros de perímetro. Unha vez rematada na altura, segundo as previsións recollidas na memoria, resultará unha cuberta plana, opaca, cun pequeno lucernario na súa parte central.

Co seu potencial de máis de 4.000 asentos, a existencia deste edificio de Bastiagueiro fará posible programar espectáculos, deportes, feiras e outros acontecementos aos que se vai adaptando o aforo.