 O orzamento de licitación é de 84.499,53 euros

A rede de saneamento completarase en próximas datas no lugar dos Muíños, na parroquia de Oleiros. Para a súa materialización, o Concello de Ribeira saca a licitación esta actuación coa que se busca seguir mellorando nas prestacións de servizos básicos ao rural.

Esta intervención dálle continuidade á executada no 2023 coa instalación da rede de saneamento con pozo de bombeo en dito lugar
da parroquia de Oleiros, que incluíu a colocación de colectores de saneamento nas vías xerais e a implantación dun pozo de bombeo en Portochouzo, se ben non estaba contemplado o saneamento nas vías secundarias. En consecuencia, este proxecto busca dotar deste servizo básico aos catro ramais do lugar dos Muíños para ofrecer unha prestación integral.

Para tal fin, demolerase o pavimento existente e colocarase a tubaxe ao longo de 421 metros, ademais de 12 pozos de rexistro, para rematar coa reposición do firme con mestura bituminosa en quente de 6 cm de espesor; uns traballos que se estenderán tres meses.

O orzamento de licitación é de 84.499,53 euros, IVE incluído, con cargo ao POS+2025. As ofertas presentaranse a través do Sistema de Licitación Electrónica da Xunta de Galicia (SILEX) antes das 23.59 horas do 27 de novembro.