 A tramitación require a documentación perceptiva e o acordo plenario

A alcaldesa de Ribeira, María Sampedro, informou hoxe sobre a situación da compra da antiga nave de Cerqueira, situado en Bandourrío. Segundo explicou, “non había absolutamente nada xestionado con relación á compra do inmoble” porque, para tal proceso, é necesaria a documentación perceptiva como é o informe de Patrimonio, especialmente, cando esta edificación se inclúe no catálogo de bens culturais no litoral. “Un informe vinculante que non existía a 10 de outubro cando anunciaron a suposta compra”, apuntou.

Trátase, ademais, dun importe inicial de adquisición que sería necesario levar ao Pleno por supoñer un investimento superior ao 10% dos recursos ordinarios da Administración local. “O órgano competente para aprobar esa compra é o Pleno da Corporación, sen o cal se poría en perigo o medio millón de fondos europeos que van a cargo do Plan de Sustentabilidade Turística”, destacou.

A maiores, a rexedora relatou que o anterior goberno solicitou no 9 de outubro a concesión dese espazo á Demarcación de Costas de Galicia, se ben “é un órgano manifestamente incompetente” ao transferirse as competencias sobre o litoral á Xunta de Galicia. De feito, precisa que no 20 de outubro chegou novamente ao Concello de Ribeira a notificación por parte de Costas de Galicia reiterando e da que se extrae, textualmente, que “con data 8 de agosto de 2025, esta Demarcación de Costas de Galicia comunicou ao Concello que existe o traspaso de funcións e servizos da Administración do Estado á Comunidade Autónoma en materia de ordenación e xestión do litoral, con data efectiva dende o 1 de xullo do 2025.” É dicir, xa no verán a Xunta de Galicia era o ente con competencia, polo que, a xuízo da alcaldesa, “ou non leron a notificación ou fixeron caso omiso.”

En consecuencia, o actual goberno municipal reuniuse coa Dirección Xeral de Enerxías Renovables e Cambio Climático, que ten a competencia na materia a través do Servizo de Litoral, coa finalidade de aclarar a situación coa directora xeral, Paula Uría. Así, o Concello de Ribeira tramitou no 31 de outubro unha nova solicitude de título concesional de ocupación “ben fundamentada”, agardando a resolución que, de ser favorable, levaría aparellada a renuncia de Cerqueiras a esta concesión.
“Reactivamos e poñemos en marcha dun xeito garantista e legal a futura compra da nave de Cerqueiras porque existe non só un compromiso coa execución de todos os fondos cos que conta este Concello, senón que tamén con toda a veciñanza de Bandourrío”, remarcou Sampedro. Un novo paso neste expediente administrativo do que xa se lle deu conta aos propietarios de Cerqueira.