Unha mestra ou mestre composteiro é unha persoa con coñecementos especializados que pode xestionar, manter e supervisar proxectos de compostaxe a nivel doméstico, comunitario ou profesional. As súas funcións inclúen controlar o proceso, resolverlle dúbidas ás usuarias e usuarios, impartir obradoiros e elaborar informes para garantir que os residuos orgánicos se transformen correctamente en materia fertilizante (o compost). A mestría en compostaxe é unha profesión con grandes perspectivas de emprego en asociacións e empresas relacionadas co ambiente, ante a aposta que están facendo pola compostaxe moitas administracións públicas comprometidas coa economía circular e a xestión sostible dos residuos, como é o caso de San Sadurniño. O colectivo Amigas da Terra vai iniciar nuns días un curso gratuíto de mestría en compostaxe, que ten como finalidade formar persoas expertas neste ámbito. Desenvolverase con sesións presenciais e en liña entre o 17 e o 27 de novembro. Só hai dispoñibles 15 prazas -preferentemente para mocidade e persoas en situación de vulnerabilidade- que se poderán solicitar até as 14:00h do martes 11 de novembro a través deste formulario.

O curso consta de oito módulos formativos e dúas xornadas de visitas a proxectos de compostaxe, nas que o alumnado poderá coñecer de primeira man experiencias de xestión descentralizada e boas prácticas no tratamento de residuos orgánicos.

O programa abordará o ciclo completo da fracción orgánica dos residuos desde a súa recollida en orixe ata a súa xestión mediante compostaxe doméstica e comunitaria, ademais de centrarse nas aplicacións do produto final como fertilizante. Ademais veranse outros aspectos como a xestión dos residuos en función dos territorios, “poñéndoa en relación co contexto de emerxencia climática e coa lexislación que lle aplica, sen obviar a educación ambiental, os riscos laborais e a mención a outras formas de compostaxe descentralizada”, comentan desde Amigas da Terra.

Arredor da xestión do compost poden xurdir proxectos de rexeneración de espazos degradados ou a creación de hortas colectivas ou de zonas verdes, sen contar con que cada vez haberá máis demanda laboral de perfís especializados para supervisar os procesos de compostaxe doméstica e comunitaria. Neste sentido, a asociación pretende que estes cursos -o de San Sadurniño é o último que ofrecerá este ano- favorezan o traballo colaborativo e a creación de pequenas iniciativas locais que dean continuidade á aprendizaxe e impulsen novas oportunidades de emprego verde.

O curso, dirixido a un máximo de 15 mozas e mozos, prioriza a participación de persoas en situación de risco de exclusión social, ofrecendo capacitación para desenvolver o perfil profesional básico de mestre/a composteiro/a. A actividade desenvolverase entre o 17 e o 27 de novembro de luns a venres en horario de 10:00h a 13:00h.

As sesións teóricas ofreceranse mediante videoconferencias ao vivo e unha plataforma en liña, aínda que se reservan as dúas últimas xornadas para visitas e prácticas de campo en San Sadurniño e/ou noutros puntos da comarca. Se algunha persoa non dispón de ordenador ou conexión a internet (imprescindible para seguir o curso), pode achegarse á Aula CeMIT para utilizar un dos seus equipos. Será necesario contactar uns días antes coa responsable da aula no 616 016 793 para ver a dispoñibilidade de ordenadores.

As inscricións están abertas até as 14:00h do día 11 de novembro a través deste formulario. Ofrecen máis información no 611 064 771.

Esta actividade, financiada pola Consellaría de Política Social, vai coincidir no tempo co arranque da campaña de información e implantación da compostaxe doméstica en San Sadurniño. Malia que ambas iniciativas tocarán o tema da compostaxe, en realidade son dous proxectos separados, xa que as accións informativas do Concello van dirixidas a toda a poboación -coa previsión de entregar cerca de 200 composteiros-, mentres que a formación de Amigas da Terra vai enfocada á capacitación para o emprego e é máis especializada. Tal é así que parte do persoal municipal tamén asistirá a este curso para adquirir os coñecementos necesarios que lle permitan atender despois as necesidades do plan de compostaxe municipal.