Este venres, 7 de novembro, arrinca o ciclo de monólogos que organiza o Museo do Humor Xaquín Marín de Fene para conmemorar o seu aniversario. Nesta primeira xornada, na que ademais se entregarán os Premios Curuxa 2025, o protagonista será Oswaldo Digón. O espectáculo, titulado “In-certo”, comezará ás 20.00 horas. E a entrada será de balde, previa recollida de invitacións (até un máximo de dúas por persoa adulta) na conserxería da Casa da Cultura de Fene o mesmo día a partir das 19 horas. Aforo limitado.

In-certo é un espectáculo de comedia onde Oswaldo Digón mestura o seu estilo de monólogos humorísticos coa súa ampla experiencia como improvisador teatral, contando historias que se desenvolven de xeito diferente en cada función, facendo que cada espectáculo sexa único e irrepetible. IN-CERTO é un texto que fala con humor e liberdade, e cunha produción escénica coidadosamente elaborada, ao ESPÍRITO do noso tempo. O tsunami tecnolóxico, a ansiedade, as preocupacións da nosa vida cotiá… Oswaldo analiza e debate co público as pequenas e grandes cousas ás que todos nos enfrontamos nun día calquera… Alguén dixo unha vez: “Quen mellor manexe a incerteza será feliz”. O que é absolutamente certo é que a comedia e o humor son a mellor maneira de enfrontarse a ela, e este formato innovador demóstrao.

OSWALDO DIGÓN (1975, San Román de Cervantes, Os Ancares, Lugo). Cómico galego que comezou a súa carreira artística como contador de historias en 1996. Actor de teatro profesional, participou en producións de xira nacional como FARIÑA e SÍBARIS. Paralelamente, Oswaldo Digón enche teatros como actor cómico e participou en proxectos como as Noites do Club da Comedia. Actualmente combina a docencia de teatro de improvisación coas súas actuacións cómicas e xiras teatrais. Máis información en www.oswaldodigon.com

Trata cita deste venres, o Novembro, mes do humor continuará o 14 de novembro con Patty Diphusa actuando na Casa da Cultura de Fene e presentando “Sexo seguro, seguro? Seguro!”.

Ciclo organizado pola Concellería de Cultura de Fene coa colaboración da Deputación da Coruña (Rede Cultural).